Thursday, January 31, 2008

ಸ್ವಯಂ ಸುಧಾರಣಾ ಆಯೋಗ ಅವಧಿ 1001ನೇ ಬಾರಿ ವಿಸ್ತರಣೆ

(ಬೊಗಳೂರು ವಿಶೇಷ ವಾಹ್-ರದ್ದಿಗಾರರಿಂದ)
ಬೊಗಳೂರು, ಜ.31- ಕಳೆದ ಸಾವಿರಾರು ವರ್ಷಗಳಿಂದ ಆಡಳಿತ ಸುಧಾರಣೆಗಾಗಿ ಹೆಣಗಾಡುತ್ತಾ, ದೇಶವು ಸಂಪದ್ಭರಿತವಾಗಬೇಕು, ಎಲ್ಲರೂ ಸಿರಿವಂತರಾಗಬೇಕು ಎಂಬಿತ್ಯಾದಿ ಕನಸಿನೊಂದಿಗೆ ಆಡಳಿತ ಸುಧಾರಣೆಯ ವರದಿ ತಯಾರಿಸುತ್ತಲೇ ಇರುವ ಆಯೋಗದ ಅವಧಿಯನ್ನು ಸಾವಿರದ ಒಂದನೇ ಸಲ ವಿಸ್ತರಿಸಲಾಗಿದೆ.

ಕೇಂದ್ರದಲ್ಲಿ ಸಂಪುಟ ರಚಿಸಿಯೂ ತಮ್ಮ ಪಕ್ಷದವರಿಗೆಲ್ಲರಿಗೂ ಬೇಕಾಬಿಟ್ಟಿ ಖಾತೆಗಳು ದೊರೆಯುವುದು ಸಾಧ್ಯವಿಲ್ಲ. ಹಾಗಾಗಿ ವಿದೇಶ ಯಾತ್ರೆ ಸಮಿತಿ, ಸಮನ್ವಯ ಸಮಿತಿ, ಆತ್ಮಹತ್ಯೆ ಅಧ್ಯಯನ ಸಮಿತಿ, ಪ್ರೇಮಿಗಳ ಪರಾರಿ ಸ್ಟಡಿ ಸಮಿತಿ, ಮಾತ್ರವಲ್ಲದೇ ಕೇಂದ್ರ ಸರಕಾರಕ್ಕೂ ಮೇಲಿನ, ವಿದೇಶೀ ಮೂಲದ ನಾರೀ ಮಣಿಗೆ ಸರ್ವ ಅಧಿಕಾರಗಳನ್ನು ನೀಡಬಲ್ಲ ಯುಪಿಎ ಸಮಿತಿ ಮುಂತಾದ ಅದೆಷ್ಟೋ ಮಿತಿಯಿಲ್ಲದ ಸಮಿತಿಗಳನ್ನು ಮಿತಿ ಮೀರಿ ಹುಟ್ಟು ಹಾಕಿರುವ ಕೇಂದ್ರ ಸರಕಾರವು, ತಮ್ಮ ಆಡಳಿತ ಸರಿ ಇಲ್ಲ ಎಂಬುದನ್ನೂ ಮನಗಂಡಿತ್ತು. ತತ್ಫಲವಾಗಿ, ಇದರ ಸುಧಾರಣೆಗಾಗಿಯೇ ಈ ದುರಾಡಳಿತ ಸುಧಾರಣಾ ಆಯೋಗವನ್ನು ರೂಪಿಸಿರುವುದು ಏನಾದರೂ ಸ್ಥಾನಮಾನಕ್ಕಾಗಿ ಹಾತೊರೆಯುತ್ತಿದ್ದವರ ಸುಯೋಗವಾಗಿತ್ತು.

ಇದರಿಂದ ಪಕ್ಷದಲ್ಲಿ ಸೂಕ್ತ ಮಾನವಿಲ್ಲದಿದ್ದರೂ, ಸ್ಥಾನ ಸಿಗದೇ ಅಸಮಾಧಾನಗೊಂಡವರೆಲ್ಲರೂ ಚೆನ್ನಾಗಿ ಸುಧಾರಣೆಯಾಗುತ್ತಿದ್ದಾರೆ ಎಂಬುದನ್ನು ಬೊಗಳೆ ಬ್ಯುರೋ ಪತ್ತೆ ಹಚ್ಚುವಲ್ಲಿ ಅಯಶಸ್ವಿಯಾಗಿದೆ.

ಈಗ ನಮ್ಮ ಹಿರಿಯರ ಪ್ರಾಚೀನ ಕಾಲದಲ್ಲಿ ರಚಿಸಲಾಗಿದ್ದ ಈ ಆಯೋಗದ ಅವಧಿಯನ್ನು ಮತ್ತಷ್ಟು ವಿಸ್ತರಿಸಲಾಗಿದ್ದು, ಈ ಬಾರಿ ಕನಿಷ್ಠ ಒಂದು ಸಾವಿರ ವರ್ಷ ವಿಸ್ತರಿಸುವ ಪ್ರಸ್ತಾಪವಿದ್ದರೂ, ಅಷ್ಟೆಲ್ಲಾ ಸಮಯ ನಾವಿರೋದು ಗ್ಯಾರಂಟಿ ಇಲ್ಲ ಎಂಬ ಬಗ್ಗೆ ಎಲ್ಲೋ ಒಂದು ಕಡೆಯಿಂದ ವಿರೋಧದ ಅತ್ಯಂತ ಕ್ಷೀಣ ದನಿ ಕೇಳಿ ಬಂದ ಹಿನ್ನೆಲೆಯಲ್ಲಿ ಸದ್ಯಕ್ಕೆ ಆರು ತಿಂಗಳು ವಿಸ್ತರಿಸೋಣ ಎಂದು ತೀರ್ಮಾನಿಸಲಾಗಿದೆ.

ಈಗಾಗಲೇ ಸಮಿತಿಯು ಹತ್ತು ಹಲವು ಬಾರಿ ವರದಿಗಳನ್ನು ಸಲ್ಲಿಸಿದ್ದು, ಆ ವರದಿಯಲ್ಲಿ ಏನಿದೆ ಎಂಬುದನ್ನು ಭಗವಂತನೊಬ್ಬನೇ ಓದಿ ತಿಳಿದುಕೊಳ್ಳುತ್ತಿದ್ದಾನೆ ಎಂದು ಅಲೌಕಿಕ ಲೋಕದಿಂದ ನಮ್ಮ ವಾಹ್-ರದ್ದಿಗಾರರು ಒದರಿದ್ದಾರೆ.

ಪ್ರಾಥಮಿಕ ವರದಿ, ದ್ವಿತೀಯಕ, ತೃತೀಯಕ, ತಾತ್ಕಾಲಿಕ, ಅಂದಾಜು ವರದಿ, ಮಧ್ಯಂತರ ವರದಿಗಳನ್ನೆಲ್ಲಾ ಸಲ್ಲಿಸುತ್ತಿದ್ದ ಈ ಸ್ವಯಮಾಡಳಿತ ಸುಧಾರಣಾ ಸಮಿತಿಯು, ಎಲ್ಲರೂ ಚೆನ್ನಾಗಿ ಸುಧಾರಣೆಯಾದ ಬಳಿಕವಷ್ಟೇ ಅಂತಿಮ ವರದಿ ಸಲ್ಲಿಸಲಿದೆ ಎಂಬುದನ್ನು ನಮ್ಮ ರದ್ದಿಗಾರರು ಪತ್ತೆ ಹಚ್ಚಿದರೂ ಆ ವರದಿಯನ್ನು ಕಳುಹಿಸದೆ ಸುಮ್ಮನೇ ಕುಳಿತಿದ್ದಾರೆ. ಯಾಕೆಂದರೆ, ಈ ವರದಿಯನ್ನು ಬ್ಯುರೋಗೆ ಕಳುಹಿಸಿಬಿಟ್ಟರೆ, ಅದನ್ನು ಅವರು ಬೊಗಳೆ ರಗಳೆಯಲ್ಲಿ ಪ್ರಕಟಿಸುತ್ತಾರೆ, ಆ ಮೇಲೆ ರದ್ದಿಗಾರರಿಗೆ ಕೆಲಸವೇ ಇರುವುದಿಲ್ಲ ಎಂಬ ದುರಾಡಳಿತ ಸುಧಾರಣಾ ಆಯೋಗದ "ಸಹವಾಸ ದೋಷ"ದ ಫಲ!

ಇದರೊಂದಿಗೆ ಅಂತಿಮ ವರದಿಗಾಗಿ ಕಾಯುವಿಕೆಗಿಂತನ್ಯ ತಪವು ಇಲ್ಲ ಎಂಬ ದಾಸರ ಪದಗಳನ್ನು ಕೇಂದ್ರವು ಭಜ್ಜಿಸುತ್ತಾ ಇರುತ್ತದೆ ಎಂದು ತಿಳಿದುಬಂದಿದೆ. ಅದು ಸಾಧ್ಯವಾಗದಿದ್ದರೆ, ಕನಿಷ್ಠ ಪಕ್ಷ ಮರಣೋತ್ತರ ವರದಿಯಾದರೂ ಲಭ್ಯವಾಗಲಿದೆ ಎಂಬುದನ್ನು ನಿರೀಕ್ಷಿಸಲಾಗುತ್ತಿದೆ.

Wednesday, January 30, 2008

ಬೊಗಳೆಗೆ 1 ಲಕ್ಷ ರೂ ದಂಡ!

(ಬೊಗಳೂರು ಬೊಗಳೆ ಬ್ಯುರೋದಿಂದ)
ಬೊಗಳೂರು, ಜ.30- ನಮ್ಮ ಪತ್ರಿಕೆಯ ಉಲ್ಲೇಖವಿರುವ ಸಾರ್ವಧನಿಕ ಹಿತಾಸಕ್ತಿ ಅರ್ಜಿಗಳಿಗೆ ಹಾಗೂ ಸಾರ್ವಜನಿಕ ಅನಾಸಕ್ತಿ ಅರ್ಜಿಗಳಿಗೆ 1 ಲಕ್ಷ ರೂ. ದಂಡ ವಿಧಿಸುವ ಕಾಲ ಬಂದಿರುವುದರಿಂದ ಬೊಗಳೂರು ಬೊಗಳೆ ಬ್ಯುರೋ ಹರ್ಷಚಿತ್ತವಾಗಿದ್ದು, ಬೊಗಳೆ ಹೆಸರಿನಲ್ಲಿ ದೇಶಕ್ಕೆ ಸಾಕಷ್ಟು ಆದಾಯ ಬರುತ್ತದೆ ಎಂದು ಕುಣಿದು ಕುಪ್ಪಳಿಸಲಾರಂಭಿಸಿದೆ.

ಈಗಾಗಲೇ ಕ್ರಿಮಿನಲ್ ಲಾಯರುಗಳಿಂದಾಗಿ ಕ್ರಿಮಿಗಳು-ನಲ್ ಆಗುತ್ತಾ, ಸಾವಕಾಶವಾಗಿ ಜೈಲಿನಿಂದ ಹೊರಬರುತ್ತಿರುವುದರಿಂದ, ಕಲಾಪ ನೋಡಲು ಯಾರಿಗೂ ಆಸಕ್ತಿ ಇರಲಿಲ್ಲ. ಇದೀಗ ಕೆಲಸಕ್ಕೆ ಬಾರದ ವಿಷಯಗಳನ್ನೆಲ್ಲಾ ಚರ್ಚೆ ಮಾಡಿದಲ್ಲಿ ಸ್ವಲ್ಪ ಮನರಂಜನಾತ್ಮಕ ಸಂಗತಿಗಳು ಹೊರಬರುತ್ತವೆ ಎಂಬ ಕಾರಣಕ್ಕೆ ಹೆಚ್ಚಿನವರು ಇಂಥ ಸಾರ್ವಧನಿಕ ಹಿತಾಸಕ್ತಿ ಅರ್ಜಿಗಳನ್ನು ಹಾಕುತ್ತಿದ್ದರು.

ಇದೀಗ ಈ ಸಾರ್ವ-ಧನಿಕರೆಲ್ಲರೂ ಒಂದೊಂದು ಲಕ್ಷ ರೂಪಾಯಿ ಕಟ್ಟಬೇಕಿರುವುದರಿಂದ ಬೊಗಳೆಗೆ ಸಂಚಕಾರ ಬಂದಿದೆಯಾದರೂ, ಬೊಗಳೆಯ ಬೆಲೆ ಕನಿಷ್ಠ 1 ಲಕ್ಷವಾದರೂ ಇದೆಯಲ್ಲ ಎಂದು ನಮ್ಮ ಸೊಂಪಾದ-ಕರು ಸಮಾಧಾನ ಪಟ್ಟುಕೊಂಡಿದ್ದಾರೆ. ಇನ್ನು ಮುಂದೆ ಎಲ್ಲರೂ ತಮಗಾಗದವರ ವಿರುದ್ಧ ಸಾರ್ವಧನಿಕ ಹಿತಾಸಕ್ತಿಯನ್ನು ಪ್ರಕಟಿಸಿ ಅರ್ಜಿ ಸಲ್ಲಿಸಬಹುದು. ಇದರಿಂದ ಬೊಗಳೆ ಎಂಬ ಪದವೂ ಉದ್ಧಾರವಾಗುತ್ತದೆ, ದೇಶದ ಅಭಿವೃದ್ಧಿಗೂ ಹಣ ಒಟ್ಟಾಗುತ್ತದೆ ಎಂದು ತಿಳಿಸಲಾಗಿದೆ.

ಆದರೂ, ಬೊಗಳೆ ಬೆಲೆಯನ್ನು ಕೇವಲ ಒಂದು ಲಕ್ಷ ಅಂತ ನಿರ್ಧರಿಸಿದ್ದು ಸರಿಯಲ್ಲ ಎಂಬ ನೋವು ಕೂಡ ಎಲ್ಲೋ ಒಂದು ಕಡೆಯಿಂದ ಹೊರಬಿದ್ದಿದೆ. ಇನ್ನು ಕೆಲವರನ್ನು ಬಲವಂತವಾಗಿ ಹಿಡಿದು ನಿಲ್ಲಿಸಿ ಸಮೀಕ್ಷೆಗೊಳಪಡಿಸಿದಾಗ, ಬೊಗಳೆಯ ಬೆಲೆ ಒಂದು ಲಕ್ಷ ಇರಬಹುದು, ಆದರೆ ಅದು ಖಂಡಿತಾ "ರೂಪಾಯಿ"ಯಲ್ಲ, "ನಯಾ ಪೈಸೆ"ಯಾಗಿರಬಹುದು ಎಂದು ಅದನ್ನೂ ತುಸು ಸಂದೇಹದಿಂದಲೇ ಹೇಳಿದರು.

ಈ ಮಧ್ಯೆ, ಬೊಗಳೆಯೇ ದಂಡ ಅನ್ನೋದು ಈ ನಿರ್ಧಾರದ ಹಿಂದಿರುವ ಸತ್ಯವೇ ಎಂಬುದನ್ನು ಸಂಶೋಧನೆ ನಡೆಸಲು ಜಗತ್ತಿನ ಖ್ಯಾತ ನಾಮ ಸಂಶೋಧಕರಿಗೆಲ್ಲಾ ಬೊಗಳೆ ನೋಟಿಸ್ ನೀಡಿದೆ.

Monday, January 28, 2008

ಬ್ರಿಟ್ನಿ ಸ್ಪಿಯರ್ಸ್ ಮಾದಕ ದ್ರವ್ಯ ಸೇವನೆ 'ವಿಳಂಬ'!

(ಬೊಗಳೂರು ಪಡ್ಡೆ ಬ್ಯುರೋದಿಂದ)
ಬೊಗಳೂರು, ಜ.28- ಇಲ್ಲಿ ಪ್ರಕಟವಾಗಿರುವ ವರದಿಯೊಂದನ್ನು ಬೊಗಳೂರಿನ ಬಾಲ-ಕರುಗಳ ಸಂಘವು ಹಾಗೂ ಬಾಲವಿಲ್ಲದ-ಕರುಗಳ ಸಂಘವು ಉಫ್ ಅಂತ ಊದಿ ನಿರ್ಲಕ್ಷಿಸಿದೆ.

ಒಂದು ಬೆಂಕಿ ಪೊಟ್ಟಣದಲ್ಲಿ ಹಿಡಿಸುವಷ್ಟು ಪ್ರಮಾಣದ ಬಟ್ಟೆಯನ್ನು "ಮೈ ತುಂಬಾ" ಹಾಕಿಕೊಂಡು, ಚಳಿಯಲ್ಲಿ ನಡುಗುತ್ತಿದ್ದ ಪಡ್ಡೆ ಹುಡುಗರನ್ನೆಲ್ಲಾ ಬಿಸಿ ಮಾಡಿ, ಅವರಿಗೆ ಜೀವದಾನ ನೀಡುತ್ತಿದ್ದ ಬ್ರಿಟ್ನಿ ಸ್ಪಿಯರ್ಸ್ 14ನೇ ವಯಸ್ಸಿನಲ್ಲಿ ಕುಡಿತ, ಮಾದಕ ದ್ರವ್ಯ ಸೇವಿಸಲು ಆರಂಭಿಸಿದ್ದಳು ಎಂಬ ಅಪ್ಪನ ಮಾತು ಕೇಳಿ ಈ ಕರುಗಳು ಬಿದ್ದು ಬಿದ್ದು ನಕ್ಕಿದ್ದಾರೆ.

ಇದೇನ್ ಮಹಾ... ನಾವೆಲ್ಲಾ ಈಗ ಹುಟ್ಟಿದ ತಕ್ಷಣವೇ ಮಾದಕ ವಸ್ತುವನ್ನು ಕೈಯಲ್ಲಿ ಹಿಡಿದುಕೊಂಡೇ ಹುಟ್ಟಿರುತ್ತೇವೆ. ಅವಳು ಇದಕ್ಕಾಗಿ 14 ವರ್ಷ ಕಾಯಬೇಕಾಗಿದ್ದು ಆಕೆಯ ಅದೃಷ್ಟವನ್ನು ತುಂಬಾ ಕಿರಿದಾಗಿಸಿದೆ. ಆಕೆ ತಮ್ಮ ಜೀವನದ ಅಮೂಲ್ಯ 14 ವರ್ಷಗಳನ್ನು ವ್ಯರ್ಥ ಮಾಡಿದಳು. ಮೊದಲೇ ನಮ್ಮ ಹಾಗೆ ಆರಂಭಿಸಿದ್ದಿದ್ದರೆ, ಮತ್ತಷ್ಟು ಮಾದಕವಾಗಬಹುದಿತ್ತು ಎಂದು ಈ ಬಾಲ-ಕರುಗಳ ಸಂಘವು ಸಲಹೆ ಮಾಡಿದೆ.

ಇನ್ನಷ್ಟು ಮಾದಕವಾಗಬಹುದಿತ್ತು ಹೌದು... ಆದರೆ ಇದರಿಂದ ನಮಗೇನಾದರೂ ಪ್ರಯೋಜನವಿದೆಯೇ ಎಂದು ನಮ್ಮ ಏನೂ ಅರಿಯದ ಮುಗ್ಧ ಬೊಗಳೆ ರಗಳೆ ಬ್ಯುರೋ ಸದಸ್ಯರು ಕೇಳಿದ ಪ್ರಶ್ನೆಗೆ ಈ ಬಾಲಕುರುಗಳ ಸಂಘದ ಅಧ್ಯಕ್ಷ ಗೋಪ-ಬಾಲಕ ಉತ್ತರಿಸಿದ್ದು ಹೀಗೆ:

"ನೋಡಿ, ನಮ್ಮ ದೇಶದ ಉತ್ತರ ಭಾಗದಲ್ಲಿ ಚಳಿಯಿಂದಾಗಿ ಸಾಕಷ್ಟು ಜನ ಸಾಯ್ತಾ ಇದ್ದಾರೆ. ಒಮ್ಮೆ ಬ್ರಿಟ್ನಿಯನ್ನು ಅವರಿಗೆಲ್ಲಾ ತೋರಿಸಿಬಿಟ್ಟರೆ, ಅವರೆಲ್ಲಾ ಬಿಸಿಯಾಗಿಬಿಡುತ್ತಾರೆ. ಹಾಗಾಗಿ ಬದುಕಿಸುವ ಕಾಯಕ ಮಾಡಬಹುದಿತ್ತು" ಎಂದು ಸಲಹೆ ನೀಡಿದ್ದಾರೆ.

ಈಗ ಎಲ್ಲಾ ಬಿಟ್ನಿಯಂಥವರಿದ್ದರೆ, ಜಾಗತಿಕ ತಾಪಮಾನ ಹೆಚ್ಚಳವಾಗಬಹುದಲ್ಲವೇ ಎಂದು ಕೇಳಿದಾಗ, " ಅದು ಹೌದು... ಆದರೆ... ಎಲ್ಲಾ ಬಿಟ್ನಿಯಂಥವರನ್ನು ಕರೆತಂದ್ರೆ ಎಲ್ಲಿ ತಾಪಮಾನ ಹೆಚ್ಚಾಗಬೇಕೋ ಅಲ್ಲಿ ಮಾತ್ರ ಹೆಚ್ಚಿಸಬಹುದು. ಮೊದಲೇ ಬಿಸಿಯಾಗಿರುವಲ್ಲಿ ಆಕೆಯನ್ನು ಕರೆದೊಯ್ಯದಿದ್ದರಾಯಿತು" ಎಂದು ಕೊಂಕು ನೋಟ ಬೀರಿದ ಉತ್ತರವೊಂದು ಬಂದಿದೆ.

Friday, January 25, 2008

ಕಿರಿ- ಕೆಟ್ ತಂಡ ಖರೀದಿಯಲ್ಲಿ ಸೋತು ಸುಣ್ಣವಾದ 'ಬಿಡ್ಡ'ರು

(ಬೊಗಳೂರು ಕ್ರಿಕೆಟ್ಟಾಟ ಫಿಕ್ಸಿಂಗ್ ಬ್ಯುರೋದಿಂದ)
ಬೊಗಳೂರು, ಜ.25- ಜಗತ್ತಿನ ಅತ್ಯಂತ ಶ್ರೀಮಂತ ಕ್ರಿಕೆಟ್ ಸಂಸ್ಥೆ ಬಿಸಿಬಿಸಿಕೈಯ ಐ(ಪಿ)ಲ್‌ನಲ್ಲಿ ತಂಡಗಳ ಖರೀದಿ ಭರದಿಂದ ಸಾಗಿದ್ದು, ಬೊಗಳೂರು ತಂಡವನ್ನು ಖರೀದಿಸುವಷ್ಟು ಯಾರೂ ಶ್ರೀಮಂತರರಿರಲಿಲ್ಲ ಎಂಬುದು ಭಾರಿ ಅಚ್ಚರಿಗೆ ಕಾರಣವಾಗಿದೆ.

ರಿ-ಲಯನ್ಸ್ ಅಧ್ಯಕ್ಷ ಅನಿಲ ಅಂಬಾಭವಾನಿ ಅವರು ಮುಂಬಯಿ ತಂಡವನ್ನು ಅತ್ಯಧಿಕ ಹಣ ನೀಡಿ, ಶಾರ್ಕ್ ಖಾನ್ ಅವರು ಕಾಲುಕುತ್ತ ತಂಡವನ್ನು, ಖೋಡೇಸ್ ಯುಬಿ ಮಲ್ಯರು ಬೆಂಗಳೂರು ತಂಡವನ್ನು ಖರೀದಿಸುವಷ್ಟು ಶ್ರೀಮಂತರಾಗಿದ್ದಾರೆ. ಆದರೆ ಬೊಗಳೂರು ತಂಡವನ್ನು ಖರೀದಿಸುವ ಹಣ ತಮ್ಮಲ್ಲಿಲ್ಲ ಎಂದು ಅವರೆಲ್ಲಾ ಕೈ ಚೆಲ್ಲಿ ಕೂತಿದ್ದಾರೆ.

ಬೊಗಳೂರಿನ ಬೊಗಳೆ ತಂಡವನ್ನು ಖರೀದಿಸಬೇಕಿದ್ದರೆ ಹೊಸದಾಗಿ ನೋಟು/ನಾಣ್ಯ ಮುದ್ರಿಸಬೇಕಾಗುತ್ತದೆ. ಯಾಕೆಂದರೆ ಅಷ್ಟು ಮೌಲ್ಯದ ಹಣ ಎಷ್ಟು ಶ್ರಮಪಟ್ಟರೂ ದೊರೆಯಲಾರದು. ಅಷ್ಟೊಂದು ಅಮೂಲ್ಯವಾದ ತಂಡಕ್ಕೆ ಜೈ ಎನ್ನುತ್ತಾ ಅವರೆಲ್ಲಾ ಬೈಬೈ ಹೇಳಿದ್ದಾರೆ.

ಈ ಬಗ್ಗೆ ಬೇರೆ ಯಾವುದೇ ಪತ್ರಿಕೆಗಳವರು ಸ್ಟಿಂಗ್ ತನಿಖೆಗೆ ಹೊರಡದ ಕಾರಣ ಬೊಗಳೂರು ಬ್ಯುರೋದ ತಂಡವನ್ನೇ ಕಳುಹಿಸಲಾಯಿತು. ಈ ಏಕಸದಸ್ಯ ಬ್ಯುರೋದ ಸಕಲ ಸದಸ್ಯರೂ ಸೇರಿಕೊಂಡು ಪತ್ತೆ ಮಾಡಿದ ಅಂಶದ ಪ್ರಕಾರ, ಬೊಗಳೂರು ತಂಡವನ್ನು ಖರೀದಿಸಲು ಬೇಕಾದ ಹಣ ಜಗತ್ತಿನ ಯಾವುದೇ ಶ್ರೀಮಂತನ ಬಳಿ ಇರುವುದಿಲ್ಲ ಎಂಬ ವಾದ ಖಚಿತವಾಯಿತು. ಯಾಕೆಂದರೆ ಸೊನ್ನೆ ಡಾಲರ್ ಆಗಲಿ, ಸೊನ್ನೆ ರೂಪಾಯಿಯಾಗಲಿ... ಈ ಸೊನ್ನೆ ಎಂಬ ಮೊತ್ತದ ನೋಟು ಎಲ್ಲೂ ದೊರೆಯುತ್ತಿಲ್ಲ ಎಂಬುದು ಎಲ್ಲರಿಗೂ ತಿಳಿದ ಸಂಗತಿ. ಆದರೆ ಬಿಡ್ಡುದಾರರು ಸೊನ್ನೆಗಿಂತಲೂ ಕಡಿಮೆ ರೂಪಾಯಿಗೆ ತಮ್ಮ ಬಿಡ್ ಸಲ್ಲಿಸಿದ್ದೇ, ಬೊಗಳೂರು ತಂಡವನ್ನು ಯಾರು ಕೂಡ ಖರೀದಿಸದಿರಲು ಕಾರಣ ಎಂಬುದು ಪತ್ತೆಯಾಗಿದೆ.

ಪಕ್ಕದಲ್ಲೇ ಬಿದ್ದಿದ್ದ ಇನ್ನೊಂದು ಮಾಹಿತಿ ಪ್ರಕಾರ, ಸೊನ್ನೆಗಿಂತ ಕಡಿಮೆ ಬೆಲೆಯಲ್ಲಿ ಖರೀದಿಸುವುದು ಸೂಕ್ತವಲ್ಲ ಎಂದು ಈ ಜಗತ್ತಿನ ಶ್ರೇಷ್ಠಾತಿಶ್ರೇಷ್ಠ ಶ್ರೀಮಂತ ಕುಳಗಳು ತೀರ್ಮಾನಿಸಿರುವುದು ಕೂಡ ಬೊಗಳೂರು ತಂಡ ಖರೀದಿಯಾಗದಿರುವುದಕ್ಕೆ ಕಾರಣ.

ಹಾಗಾಗಿ ಬೊಗಳೂರು "ಸು"ರಕ್ಷಿತವಾಗಿದೆ, ಭದ್ರವಾಗಿ ನೆಲೆ ನಿಂತಿದೆ ಮತ್ತು ಬೊಗಳೂರನ್ನು ಯಾರೂ ಏನೂ ಮಾಡಲಾರರು ಎಂಬುದು ತನಿಖೆಯ ವೇಳೆ ಶ್ರುತಪಟ್ಟಿದೆ.

Wednesday, January 23, 2008

ಪಾಪಕ್ಕೆ ಪಶ್ಚಾತ್ತಾಪವೇ ಪ್ರಾಯಶ್ಚಿತ್ತ!

(ಬೊಗಳೂರು ಪಶ್ಚಾತ್ತಾಪ ಬ್ಯುರೋದಿಂದ)
ಬೊಗಳೂರು, ಜ. 23- ಭಾರ-ತಾ ರತ್ನ ಎಂದು ಆದೇಶಿಸುತ್ತಾ, ಚುನಾವಣೆಯೆಂಬ ಮಹಾಭಾರತ ಯುದ್ಧ ಆರಂಭವಾಗುವ ಹೊತ್ತಿಗೆ ತಮ್ಮವರನ್ನೆಲ್ಲಾ ಕಳೆದುಕೊಂಡ ಸುಯೋಧನನಂತೆ ಪರಿತಪಿಸತೊಡಗಿರುವ ಒದಿಯೋಗೌಡ್ರ "ಕನ್ನಡನಾಡಲ್ಲಿ ಹುಟ್ಬಾರ್ದಿತ್ತು' ಅನ್ನೋ ಹೇಳಿಕೆಗೆ ವ್ಯಾಪಕ ಶ್ಲಾಘನೆ, ಕೇಕೆ, ಪೀಪಿ, ಹುರ್ರಾ, ಸ್ವಾಗತ, ವಾಹ್ ವಾಹ್‌ಗಳು ಕೇಳಿಬರತೊಡಗಿವೆ.

ಈ ರಾಜ್ಯದಲ್ಲಿ ಹೋದಲ್ಲೆಲ್ಲಾ ತಮಗೆ ಅತ್ಯುಚ್ಚ "ಗೌರವ" ದೊರೆಯುತ್ತಿದೆ ಎಂಬ ಅರಿವುಳ್ಳ ಅವರು ಈ ಮಾತು ಹೇಳಿದ್ದಾರೆ ಎಂಬುದನ್ನು ಬೊಗಳೆ ರಗಳೆ ಬ್ಯುರೋ ಪತ್ತೆ ಹಚ್ಚಿದೆ.

ಈ ರಾಜ್ಯದಲ್ಲಿ ಹುಟ್ಟಿ ಏನೂ ಪ್ರಯೋಜನವಾಗಲಿಲ್ಲ. ತಮ್ಮ ಎರಡನೇ ಮಗನನ್ನು ಮುಖ್ಯಮಂತ್ರಿ ಮಾಡಲಾಗಲಿಲ್ಲ, ನಾನು ಮತ್ತೊಮ್ಮೆ ನಿಧಾನಿಯಾಗಲಿಲ್ಲ, ಕೊಟ್ಟ ಮಾತನ್ನು ಉಳಿಸಿಕೊಳ್ಳಲು "ಸಾಧ್ಯ" ಆಗಲಿಲ್ಲ, ಒಂದು ವಿಧಾನಸಭಾ ಅವಧಿಯಲ್ಲಿ ತಮ್ಮ ಪಕ್ಷವು ಕೇವಲ ಎರಡೇ ಬಾರಿ ರಾಜ್ಯದಲ್ಲಿ ಅಧಿಕಾರ ಚಲಾಯಿಸಲು ಸಾಧ್ಯವಾಗಿದ್ದು, ಅದಕ್ಕಿಂತ ಹೆಚ್ಚು ಸಲ ಆಳ್ವಿಕೆ ಮಾಡಲಾಗಲಿಲ್ಲ ಎಂಬಿತ್ಯಾದಿ ಪರಿತಾಪಗಳೊಂದಿಗೆ ಅವರ ಹೇಳಿಕೆಯನ್ನು ಸಮರ್ಥಿಸಿಕೊಳ್ಳಲಾಗುತ್ತಿದ್ದು, ರಾಜ್ಯದ ಜನತೆ ಕೂಡ ಇದನ್ನು ಬೆಂಬಲಿಸುತ್ತಿದ್ದಾರೆ.

ಹೌದು. ಅವರು ಹೇಳಿದ್ದು ಸರಿ. ಅವರು ಕನ್ನಡ ಮಣ್ಣಿನಲ್ಲಿ ಹುಟ್ಟಬಾರದಿತ್ತು, ಇದು ನಮ್ಮ ಕರ್ಮ ಅಂತ ಬೊಗಳೂರಿನ ಮಂದಿ ಆಡಿಕೊಳ್ಳುತ್ತಿದ್ದಾರಾದರೂ, ಅವರು ನೇರವಾಗಿ ಅದನ್ನು ಹೇಳದಂತೆ, ಅವರ ಬಾಯಿಗೆ ರೈತಮಹಿಳೆಯ ತಲೆ ಮೇಲಿದ್ದ ಹುಲ್ಲಿನ ಹೊರೆಯನ್ನು ತುರುಕಲಾಗುತ್ತಿದೆ.

ಇದರಿಂದ ಆಕ್ರೋಶಗೊಂಡಿರುವ ಬೊಗಳೂರು ಜನತೆ, ನಮ್ಮ ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಅಪಚಾರ ಮಾಡಲಾಗುತ್ತಿದೆ ಎಂದು ಹೊಯ್ದಾಡುತ್ತಿದ್ದು, ಬೇರೆಯದೇ ರೀತಿಯಲ್ಲಿ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಲಾರಂಭಿಸಿದ್ದಾರೆ.

ಹಾಗಿದ್ರೆ, ನಾವೇ ಇಲ್ಲಿ ಹುಟ್ಬಾರ್ದಿತ್ತು. ಇಂಥವ್ರು ಹುಟ್ಟಿದಲ್ಲಿ ನಾವು ಹುಟ್ಟಿರೋದು ನಮ್ ಕರ್ಮ. ಇಂಥವ್ರಿಗೆ ಓಟು ಹಾಕೋದು ನಮ್ಮ ಪೂರ್ವಜನ್ಮದ ಪಾಪದ ಫಲ. ಭೂಮಿಗೆ ಭಾರವಾದವರಿಗೆ ಭಾರ-ತಾ ರತ್ನ ಪ್ರಶಸ್ತಿ ಘೋಷಿಸಲೇಬೇಕು ಎಂದು ಕೆಲವರು ಆಗ್ರಹಿಸತೊಡಗಿದ್ದಾರೆ.

ಕೊನೆಗಾದರೂ ಈ ಸತ್ಯವು ಅವರ ಅರಿವಿಗೆ ಬಂದಿದ್ದು ನಮ್ಮ ಪುಣ್ಯವೂ ಹೌದು. ಅವರ ಹೇಳಿಕೆಯನ್ನು ನಾವು ಹೃದಯತುಂಬಿ ಸ್ವಾಗತಿಸುತ್ತೇವೆ. ಕನ್ನಡಿಗ ಆಗಿರುವುದಕ್ಕೆ ನಾಚಿಕೆಯಾಗುತ್ತಿದೆ ಅಂದುಕೊಂಡಿದ್ದಾರಂತೆ. ಅವರು ರಾಜ್ಯ ರಾಜಕೀಯವನ್ನು ವಿಶ್ವಮಟ್ಟದಲ್ಲಿ ಸುದ್ದಿಯಾಗುವಂತೆ ಇತ್ತೀಚೆಗೆ ಮಾಡಿದ್ದಾಗ, ನಾವೆಷ್ಟು ನಾಚಿಕೆಪಟ್ಟುಕೊಂಡಿಲ್ಲ? ಕನ್ನಡಿಗರೆಷ್ಟು ಆಳಕ್ಕೆ ತಲೆಯನ್ನು ತಗ್ಗಿಸಿರಲಿಲ್ಲ? ಎಂದು ಬೊಗಳೂರು ಜನತೆ ಪ್ರಶ್ನಿಸಿದ್ದಾರೆ.

ಹೀಗಾಗಿ ಅವರು ಮಾಡಿದ್ದು ಸರಿ. ತಾವು ಇದುವರೆಗೆ ಮಾಡಿದ ಪಾಪಕ್ಕೆಲ್ಲಾ ಪಶ್ಚಾತ್ತಾಪ ಪಟ್ಟುಕೊಂಡರೆ ಪ್ರಾಯಶ್ಚಿತ್ತ ಮಾಡಿಕೊಂಡಂತೆ ಎಂಬುದು ಎಲ್ಲರಿಗೂ ತಿಳಿದ ವಿಷಯ. ಪಶ್ಚಾತ್ತಾಪ ಪಟ್ಟುಕೊಳ್ಳುತ್ತಾ ಇರುತ್ತಾರೆ ಬಿಡಿ. ಶೀಘ್ರದಲ್ಲೇ ಪರಿತಪಿಸಿ, ಪಾಪಗಳಿಂದ ಮುಕ್ತರಾಗುತ್ತಾರೆ ಮತ್ತು ರಾಜ್ಯದ ಜನತೆ ಇನ್ನು ಮುಂದೆ ಪಾಪ ಮಾಡದಂತಹ ಮಟ್ಟಕ್ಕೆ ಅವರನ್ನು ಏರಿಸಲಿದ್ದಾರೆ ಎಂದು ತನಿಖೆಯಿಂದ ತಿಳಿದುಬಂದಿದೆ.

Monday, January 21, 2008

ಬೊಗಳೆಗೂ ಭಾರ-ತಾ ರತ್ನ ಆದೇಶ

(ಬೊಗಳೂರು ಅರಾಜಕೀಯ ಬ್ಯುರೋದಿಂದ)
ಬೊಗಳೆಯ ಕೊರಳಿಗೆ ರತ್ನಳನ್ನು ಕಟ್ಟುವ ಪ್ರಯತ್ನದ ಹಿಂದಿನ ಅಸತ್ಯಾಂಶ ಬಯಲಾಗಿದೆ. ಬೊಗಳೆಗೆ ಎಲ್ಲರೂ ಒಟ್ಟು ಸೇರಿ ಸಂಚು ಹೂಡಿ ನೀಡಲು ಉದ್ದೇಶಿಸಿರುವುದು ಅನಾಗರಿಕ ರತ್ನ ಪ್ರಶಸ್ತಿ ಅಲ್ಲ, ಬದಲಾಗಿ ಭಾರ-ತಾ ರತ್ನ ಪ್ರಶಸ್ತಿ ಆದೇಶ ಎಂಬುದು ಪತ್ತೆಯಾಗಿದೆ.

ದೇಶದ ಅತ್ಯುನ್ನತ ನಾಗರಿಕ ಪ್ರಶಸ್ತಿಗೆ ಹಾದಿ ಬೀದಿಯಲ್ಲಿರುವವರೆಲ್ಲರ ಹೆಸರು ಕೇಳಿಬರುತ್ತಿರುವುದರಿಂದ ತೀವ್ರ ಕಂಗೆಟ್ಟ ಬೊಗಳೆ ರಗಳೆ ಬ್ಯುರೋ, ತಲೆ ತಪ್ಪಿಸಿಕೊಂಡಿತ್ತು. ಆದರೂ "ಭಾರ-ತಾ ರತ್ನ" ಎಂದು ಆದೇಶಿಸುವ ಹಯಗ್ರೀವಾಜ್ಞೆ ಈಗಾಗಲೇ ಹೊರಬಿದ್ದಿರುವುದಾಗಿ ತಿಳಿದುಬಂದಿದೆ.

ಸೂಟ್‌ಕೇಸ್‌ಗಟ್ಟಲೇ ಭಾರ ಭಾರವಾದ ರತ್ನಗಳನ್ನು ಹೊತ್ತು ತರಬೇಕು ಎಂದು ಈ ರೀತಿ ಆದೇಶ ನೀಡಿರುವುದು ಬಹುಶಃ ಜಾರಕಾರಣಿಗಳ ಜನಾಂಗೀಯರೇ ಇರಬೇಕು ಎಂದು ಶಂಕಿಸಲಾಗಿದ್ದು, ಮುನ್ನೆಚ್ಚರಿಕೆ ಕ್ರಮವಾಗಿ ಅವರ ಜನಾಂಗೀಯ ನಿಂದನೆ ಮಾಡಲು ಈಗಾಗಲೇ ಭಜ್ಜಿಗೆ ಕರೆ ಕಳುಹಿಸಲಾಗಿದೆ.

ಕರುನಾಡಿನಲ್ಲಿ ಈಗಾಗಲೇ ಚುನಾವಣೆಗಳೂ ಘೋಷಣೆಯಾಗಿರುವುದರಿಂದ ಮದಿರೆಯಲ್ಲಿ ಕರುನಾಡನ್ನು ತೇಲಾಡಿಸಿ ಅ-ಮಲುನಾಡು ಮಾಡಲು ಸಾಕಷ್ಟು ರತ್ನಗಳ ಅವಶ್ಯಕತೆಯೂ ಬೀಳುತ್ತಿದೆ. ಇದಕ್ಕಾಗಿ ಬೊಗಳೆ ರಗಳೆಗೆ ಹೆಚ್ಚು ಹೆಚ್ಚು ಭಾರವಿರುವ ರತ್ನಗಳನ್ನು ತುಂಬಿರುವ ಸೂಟ್‌ಕೇಸ್ ತಾ ಅಂತ ಆದೇಶ ನೀಡಲಾಗಿದೆ.

ಹೆಚ್ಚು ಹೆಚ್ಚು ಭಾರ ತಂದರೆ, ಅದನ್ನು ಹರಿದು ಹಂಚಿಬಿಡಬಹುದು. ಆ ನಂತರ ಅಳಿದುಳಿದರೆ ಮಿಕ್ಕ ದುಡ್ಡಿನಲ್ಲಿ ಮಾಧ್ಯಮ ರತ್ನ, ಉದ್ಯೋಗ ರತ್ನ, ಹಣಕಾಸು ರತ್ನ, ಸಹಕಾರ ರತ್ನ, ಪ್ರಚಾರ ರತ್ನ, ಕಲಾವಿದ ರತ್ನ, ಸಾಹಿತ್ಯ ರತ್ನ ಎಂಬಿತ್ಯಾದಿ ರತ್ನಗಳನ್ನು ಹೆಚ್ಚು ಹೆಚ್ಚು ಪ್ರಚಾರ ನೀಡಿದವರಿಗೆ, ಹೆಚ್ಚು ಹಣ ಕೊಟ್ಟವರಿಗೆ, ಹೆಚ್ಚು ಸಹಕಾರ ಮಾಡಿದವರಿಗೆ, ಬೆಂಬಲಿಸಿ ಲೇಖನ ಬರೆದವರಿಗೆ ವಿತರಿಸಬಹುದು. ಆದರೆ ಯೆಂಡ್ಕುಡುಕ ರತ್ನ ಪ್ರಶಸ್ತಿಯನ್ನೂ ಯಾರಿಗಾದರೂ ನೀಡಬೇಕು ಎಂಬುದಾಗಿ ನಮ್ಮ ಬ್ಯುರೋ ಪಟ್ಟು ಹಿಡಿದುಕೂತಿದೆ.

ಚುನಾವಣೆಗಳು ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಪ್ರತಿಯೊಬ್ಬ ಅಡ್ಡದಂಧೆಕೋರರಿಗೆ, ದುಡ್ಡಿನಲ್ಲೇ ತೇಲಾಡುತ್ತಿರುವವರಿಗೆಲ್ಲರಿಗೂ ಭಾರ-ತಾ ರತ್ನ ಪ್ರಶಸ್ತಿ ಹೊರಬೀಳುವುದು ಖಚಿತವಾಗಿದೆ.

Friday, January 18, 2008

ಪರ್ಯಾಯಕ್ಕೆ ಪರ್ಯಾಯವಾಗದ ಪರ್ಯಾಯ

(ಬೊಗಳೆ ರಗಳೆ ಫ್ಲ್ಯಾಶ್ ಸುದ್ದಿ)

ಉಡುಪಿಯಲ್ಲಿ ಪರ್ಯಾಯಕ್ಕೆ ಪರ್ಯಾಯವೇ ಪರ್ಯಾಯ ಎಂಬಂತೆ ಪರ್ಯಾಯಕ್ಕೆ ಪರ್ಯಾಯವಾಗದ ಪರ್ಯಾಯವೂ, ಪರ್ಯಾಯಕ್ಕೆ ಪರ್ಯಾಯವಾದ ಪರ್ಯಾಯವೂ ನಡೆದು ಹೋಗಿದೆ ಎಂದು ಬೊಗಳೆ ರಗಳೆ ಬ್ಯುರೋ ವಿಶೇಷ ಸುದ್ದಿಯನ್ನು ಫ್ಲ್ಯಾಶ್ ರೂಪದಲ್ಲಿ ತುಂಬಾ ತಡವಾಗಿ ನೀಡುತ್ತಿದೆ.

Thursday, January 17, 2008

ಪಕ್ಷ ತೊರೆಯಲು ಒದಿಯೋಗೌಡ್ರ ಸಿದ್ಧತೆ!

(ಬೊಗಳೂರು ವಿ-ಪಕ್ಷ ಬ್ಯುರೋದಿಂದ)
ಬೊಗಳೂರು, ಜ.17- ಎಲ್ಲರೂ ದಳಬಳನೇ ಅತ್ತರು, ದಳ ಬಿಟ್ಟರು, ಇನ್ನೂ ಕೆಲವರು ಬಿಡುತ್ತಿದ್ದಾರೆ... ಹಾಗಾದ್ರೆ ಒದೆಯೋಗೌಡ್ರು ಯಾವ ಪಕ್ಷ ಸೇರ್ತಾರೆ ಎಂಬ ಪ್ರಶ್ನಾರ್ಥಕ ಚಿಹ್ನೆಯು ಬೊಗಳೂರಿನ ಮೂಲೆ ಮೂಲೆಯಲ್ಲೂ ಹಾರಾಟ ಆರಂಭಿಸಿದೆ.

ಕಮಲಕ್ಕೂ ಕೈಗೂ ಕೈಕೊಟ್ಟ ಬಳಿಕ ಜನತಾ ದಳದಲ್ಲಿರುವ ಎಲ್ಲಾ ದಳಗಳು ಉದುರಿಹೋಗುತ್ತಿರುವುದರಿಂದ, ಪಕ್ಷ ಬಿಟ್ಟು ಹೋದರೆ ಏನೋ ದೊರೆಯುತ್ತದೆ. ಅದಕ್ಕಾಗಿಯೇ ಎಲ್ಲರೂ ತಮ್ಮ ಪಕ್ಷದಿಂದ ದೂರ ಹೋಗುತ್ತಿದ್ದಾರೆ. ನಾವು ಕೂಡ ಹೋಗೋಣ ಎಂದು ಅವರು ಚಿಂತಿಸುತ್ತಿರುವುದಾಗಿ ವರದಿಯಾಗಿದೆ.

ಆ "ಏನೋ ದೊರೆಯುತ್ತದೆ" ಎಂಬುದು ಏನು ಎಂಬುದರ ಕುರಿತು ಬೊಗಳೆ ರಗಳೆ ನಿಂತಲ್ಲೇ ತಿರುತಿರುಗಿ ಹಲವು ಸುತ್ತುಗಳ ಸಮೀಕ್ಷೆ ನಡೆಸಿತು. ಆದರೆ ಯಾವುದೇ ಸ್ಪಷ್ಟ ಸೂಚನೆಗಳು ಕಂಡುಬರಲೇ ಇಲ್ಲ. ಅಂತೆ ಕಂತೆಗಳನ್ನೇ ಕಂತೆ ಕಂತೆ ಪೇರಿಸಿಟ್ಟು ನೋಡಿದಾಗ, ದೊರೆತ ಒಂದು ವಿಷಯವೆಂದರೆ ಮತ್ತೆ ಪ್ರಧಾನಿ ಪಟ್ಟವೇನಾದರೂ ದೊರೆತೀತೇ? ಎಂಬುದು. ಇದಕ್ಕೆ ಕಾರಣವೆಂದರೆ ಮಾಯಾಂಗನೆಯ ಈ ಹೇಳಿಕೆ.

ಈ ಪಕ್ಷದಲ್ಲಿದ್ದುಕೊಂಡು ಒಳ್ಳೆಯ ಹೆಸರು ಸಂಪಾದಿಸಿ ಆಗಿದೆ. ಇನ್ನು ಮಾಡೋದೆಲ್ಲಾ ಅಷ್ಟರಲ್ಲೇ ಇದೆ. ಇಲ್ಲಿ ಮತ್ತಷ್ಟು ಒಳ್ಳೆಯ ಹೆಸರು ಸಂಪಾದಿಸುವ ಸಾಧ್ಯತೆಗಳೆಲ್ಲವೂ ಖಾಲಿಯಾಗಿವೆ. ಹಾಗಾಗಿ ಹೊಸ ವರ್ಷಕ್ಕೆ ಹೊಸ ಪಕ್ಷ, ಹೊಸ ನಾನೋ ನೀನೋ ಎಂಬ ಕಾರು, ಹೊಸ ತೆನೆ ಹೊತ್ತ ಹೊಸ ಮಹಿಳೆ, ಹೊಸ ಮನೆ, ಹೊಸ ಬೆಂಬಲಿಗರು, ಹೊಸ ಚುನಾವಣೆ, ಹೊಸ ಅಧಿಕಾರ... ಇತ್ಯಾದಿಗಳ ಕನಸಿನಲ್ಲೇ ಮುಳುಗಿರುವ ಅಪ್ಪಮಕ್ಕಳು, ಫೀನಿಕ್ಸ್ ಹಕ್ಕಿ ಮೈಕೊಡವಿದಾಗ ಬೂದಿಯೆಲ್ಲಾ ಹಾರಾಡುವಂತೆ ಪ್ಲಾನ್ ರೂಪಿಸುತ್ತಿದ್ದಾರೆ.

ಪಕ್ಷದಲ್ಲಿ ತತ್ವ ಇಲ್ಲ, ಸಿದ್ಧಾಂತ ಇಲ್ಲ ಎಂದೆಲ್ಲಾ ಗಾಳಿಮಾತುಗಳು ಕೇಳಿಬರುತ್ತಿವೆ. ಇದ್ದರೂ ಇರಬಹುದು! ಹಾಗಾಗಿ ಇವೆಲ್ಲಾ ಏನೂ ಇಲ್ಲದಿದ್ದರೆ ಪಕ್ಷವಾದರೂ ಇರುವುದು ಹೇಗೆ? ಪಕ್ಷವೇ ಇಲ್ಲವೆಂದ ಮೇಲೆ ಬೇರೊಂದು ಪಕ್ಷ ಸೇರುವುದೇ ಸರಿ ಅಲ್ಲವೇ? ಹಾಗಾಗಿಯೇ ಇಲ್ಲದ ಪಕ್ಷ ತೊರೆಯಲು ನಿರ್ಧರಿಸಿರುವುದಾಗಿ ಏನೂ ತಿಳಿಯದ ಮೂಲಗಳು ವರದಿ ಮಾಡಿವೆ.

Wednesday, January 16, 2008

ಅನಾಗರಿಕ "ರತ್ನ" ಕೊಡಿಸಲು ತೀವ್ರ ಯತ್ನ

(ಬೊಗಳೂರು ಅನಾಗರಿಕ ಬ್ಯುರೋದಿಂದ)
ಬೊಗಳೂರು, ಜ.17- ಬೊಗಳೆ ರಗಳೆ ಬ್ಯುರೋದ ಸಂಪಾದಕರಿಗೆ ಇಲ್ಲದ ಮರ್ಯಾದೆಯನ್ನು ಗುಡಿಸಿ ಸಾರಿಸಿ ತೆಗೆಯುವ ಪ್ರಯತ್ನವೊಂದು ಸದ್ದಿಲ್ಲದೇ ನಡೆಯುತ್ತಿದ್ದು ಇದನ್ನು ಪತ್ತೆ ಹಚ್ಚಲಾಗಿದೆ.

ನಮಗಾಗದವರು ಎಷ್ಟೇ ವಿರೋಧಿಸಿದರೂ, ಅತ್ಯಂತ ಮೆಚ್ಚಿಕೊಳ್ಳುವ ಮಂದಿ ಯಾರೋ ನಮ್ಮ ಹೆಸರನ್ನು ದೇಶದ ಅತ್ಯುನ್ನತ 'ಅ'ನಾಗರಿಕ ಪ್ರಶಸ್ತಿಗೆ ಸೂಚಿಸಲು ಸಿದ್ಧತೆ ನಡೆಸಿರುವ ಬಗ್ಗೆ ಅನಾ"ಮತ್ತಾಗಿ" ಗೊಂದಲದಲ್ಲಿದ್ದೇವೆ ಎಂದು ಸೊಂಪಾ(ಗಿಬೆಳೆ)ದಕರುಗಳು ಮಧ್ಯರಾತ್ರಿ ಏರ್ಪಡಿಸಲಾಗಿದ್ದ ತುರ್ತು ಪಾನಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಇದಕ್ಕೆ ಕಾರಣವೆಂದರೆ, ಈ ಅಭೂತಪೂರ್ವ ಪ್ರಶಸ್ತಿಯನ್ನು ಬೊಗಳೆಯ ಕುತ್ತಿಗೆಯ ಸುತ್ತ ಕಟ್ಟಿರುವ ಸರಪಳಿಗೆ ಸಿಕ್ಕಿಸಿಬಿಡಲು ತೀವ್ರ ಪ್ರಯತ್ನಗಳು ನಡೆಯುತ್ತಿವೆ ಎಂಬ ವರದಿ ಕೇಳಿ ಬೊಗಳೆಗೆ ಬೊಗಳೆಯೇ ಬೆಚ್ಚಿ ಬಳಲಿ ಬೆಂಡಾಗಿ ಬೆಂದು ಹೋಗಿರುವುದು.

ಆಡ್ವಾಣಿ ಅವರು ವಾಜಪೇಯಿ ಹೆಸರನ್ನು ದೇಶದ ಅತ್ಯುನ್ನತ ಪ್ರಶಸ್ತಿಗೆ ನಮೂದಿಸಿದ ಬೆನ್ನಿಗೇ, ನಮ್ಮವರಿಗೆ ನೀಡಬೇಕು, ತಮ್ಮವರಿಗೆ ನೀಡಬೇಕು ಎಂಬುದಾಗಿ ಎಲ್ಲಾ ಅರಾಜಕೀಯ ಪಕ್ಷಗಳು ಗುದ್ದಾಟ ಆರಂಭಿಸಿವೆ. ಇದೀಗ ತನ್ನ ಹೆಸರನ್ನು ಕೂಡ ಯಾರಾದರೂ ಶಿಫಾರಸು ಮಾಡಿ, ಬೊಗಳೆ ರಗಳೆ ಬ್ಯುರೋಗೆ ದಕ್ಕುವ ಸಾಧ್ಯತೆ ಇರುವ ಆ ಪ್ರಶಸ್ತಿಯನ್ನು ಬೇರೆಯವರ ಹೆಗಲಿಗೆ ಜಾರಿಸಿಬಿಡುವ ನಿಟ್ಟಿನಲ್ಲಿ ಕೆಲವರ ಹೆಸರುಗಳನ್ನು ಶಿಫಾರಸು ಮಾಡಲಾರಂಭಿಸಿದೆ.

ಇಂಥ ಪ್ರಶಸ್ತಿಗೆ ನಮ್ಮ ಆನೆಬಲದ ಜನ್ಮದಾತ ಕಾನ್ಶೀಗೇ ಭಾರತ ರತ್ನ ಕೊಡಬೇಕೆಂದು ಮೇಲು-ಕೀಳು-ಜಾತಿ ರಾಜಕೀಯದಿಂದ ಮೇಲೆ ಬಂದ ಮಾಯಾವತಿ, ಬೂಸಾ ತಿಂದು ಕೇಂದ್ರದಲ್ಲಿ ರೈಲನ್ನೇರಿ ಒಳ್ಳೆ ಹೆಸರು ಗಳಿಸಿಕೊಂಡ ಪಾಲು ಪ್ರಸಾದ್ ಲಾದವ್, ಬೆಂಬಲ ಹಿಂತೆಗೆತದ ಬೆದರಿಕೆ ಒಡ್ಡುವುದರಲ್ಲಿ ವಿಶ್ವದಾಖಲೆಯ ಸಂಖ್ಯೆ ತಲುಪುತ್ತಿರುವ ಮತ್ತು ನಂದಿಗ್ರಾಮ ನರಮೇಧದಲ್ಲಿ ಏನೂ ಆಗದಂತಿರುವ ಪಕ್ಷದ ಹಿರಿಯ ಕೊಂಡಿ ಜ್ಯೋತಿ ಬಸು, ನಾಯಕರಿಲ್ಲದೇ ಬಳಲುತ್ತಿದ್ದ ಪಕ್ಷವೊಂದಕ್ಕೆ ಇಟಲಿಯಿಂದ ಬಂದು ನಾಯಕತ್ವ ನೀಡಿ, ಪಕ್ಷವನ್ನು ಒಡೆದು ಚೂರಾಗದಂತೆ ತಡೆದ, ವಿಶ್ವವಿಖ್ಯಾತ ನಾಸಿಯಾ ಗಾಂಧಿ, ಆರೋಗ್ಯವಂತರಿಗೆಲ್ಲಾ ಅನಾರೋಗ್ಯದ ಪಾಠ ಹೇಳುತ್ತಾ, ನಮಗಾಗದವರನ್ನು ಕಿತ್ತು ಹಾಕುವುದು ಹೇಗೆ ಎಂಬ ಸಂಚು ರೂಪಿಸುವ ನಿಪುಣ ರೋಮ್ ದಾಸ್ ಇವರಿಗೆಲ್ಲಾ ಕೊಡಬಹುದು ಅಂತ ಶಿಫಾರಸು ಮಾಡಲಾಗುತ್ತಿದೆ.

ಆದರೂ ಬೊಗಳೆ ರಗಳೆ ಬ್ಯುರೋದ ಆದ್ಯತೆ ಮಾತ್ರ.... ನಮ್ಮ ಒದೆಯೋಗೌಡ್ರಿಗೇ ಎಂಬುದನ್ನಿಲ್ಲಿ ಸ್ಪಷ್ಟಪಡಿಸಲಾಗುತ್ತಿದೆ. ಕರ್ನಾಟಕ ಕಂಡ ಅಪರೂಪದ ಜಾರಕಾರಣಿ, ಎಲ್ಲಿಯೂ ಕಾಣಸಿಗದ ರಾಜಕೀಯ ಚಾಣಾಕ್ಷ, ಕುಶಾಗ್ರಮತಿ, ಮೌನವಾಗಿದ್ದುಕೊಂಡೇ ಕೆಲಸ ಸಾಧಿಸಿಕೊಳ್ಳುವ ನಿಪುಣ, ಕೈಬೆರಳಲ್ಲೇ ಸರಕಾರವನ್ನು ಅಲುಗಾಡಿಸಬಲ್ಲ ನಿಷ್ಣಾತ, ಪತ್ರ ಪ್ರವೀಣ, ಎಚ್ಚರಿಕೆ ಸಂದೇಶದಲ್ಲಿ ಅತಿಕುಶಲ, ಕೆಲಸವಾದ ತಕ್ಷಣ ಏರಿದ ಏಣಿ ಒದೆಯುವುದೇ ಮುಂತಾದ ಸಹಸ್ರನಾಮ ಸಮಾನವಾದ ಗುಣಗಳನ್ನು ಇದಕ್ಕಾಗಿಯೇ ಪಟ್ಟಿ ಮಾಡಲಾಗುತ್ತಿದೆ.

ಆದರೆ, ಅಲ್ಪಸಂಖ್ಯಾತರನ್ನು ಕಡೆಗಣಿಸಲಾಗುತ್ತಿದೆ, ಅವರ ಭಾವನೆಗಳಿಗೆ ಧಕ್ಕೆಯಾಗುತ್ತಿದೆ. ಅವರ ಹೆಸರು ಕೂಡ ಶಿಫಾರಸು ಮಾಡಬೇಕು, ಇಲ್ಲವಾದಲ್ಲಿ ನಿಮ್ಮ ರಗಳೆಯನ್ನು ಪರಿಗಣಿಸುವುದಿಲ್ಲ, ನಿಮಗೇ ಕೊಟ್ಟುಬಿಡುತ್ತೇವೆ ಅಂತ ಕೇಂದ್ರಾರೂಢ ಪಕ್ಷವು ಖಡಾಖಂಡಿತವಾಗಿ ಛೀಥೂ ಎನ್ನುತ್ತಾ ಬೆದರಿಸಿರುವುದರಿಂದ, ಅಷ್ಟೆಲ್ಲಾ ಸಂಸತ್ ದಾಳಿ ಮೂಲಕ ರಾಜಕೀಯ ಕ್ಷೇತ್ರ ನಿರ್ನಾಮ ಮಾಡಲೆತ್ನಿಸಿಯೂ ಏನೂ ಆಗದೆ ಪಾರಾಗಿ ಬಂದಿರುವ ತಂಡದಲ್ಲಿದ್ದವನೆನ್ನಲಾದ ನಮ್ಮ ಮಹಾಮಹಿಮ ಅpuzzle ಗುರುಗಳ ಹೆಸರನ್ನು ಸೂಚಿಸಲು ನಿರ್ಧರಿಸಲಾಗಿದೆ.

ಮತ್ತೊಂದು ಕೊನೆಯ ಪ್ರಯತ್ನವಾಗಿ, ಅತ್ಯುನ್ನತ ಅನಾಗರಿಕ ಪ್ರಶಸ್ತಿಯು, ಜನರ ತೆರಿಗೆ ಹಣದಲ್ಲಿ ಐಷಾರಾಮಿ ಜೀವನ ಸಾಗಿಸುತ್ತಾ, ಜನಸಾಮಾನ್ಯ ನೇರವಾಗಿ ಮೇಲಕ್ಕೆ ಹೋಗುವಂತೆ ಮಾಡುತ್ತಿರುವ ಜಾರಕಾರಣಿಗಳಿಗೆ ಯಾರಿಗೇ ಕೊಟ್ಟರೂ ತಮ್ಮ ಸಂಪೂರ್ಣ ಬೆಂಬಲವಿದೆ ಎಂದು ಬೊ.ರ. ಘೋಷಿಸುತ್ತಿದೆ.

Monday, January 14, 2008

ಮಾಧ್ಯಮಗಳಿಗೆ ಅಸತ್ಯ ನಿಷಿದ್ಧವೇ?

  • ಅಕ್ಷರ ಸಂಕ್ರಾಂತಿಯಾಗಲಿ ಎಂಬ ಹಾರೈಕೆಯೊಡನೆ ಬೊಗಳೆಯ ಎಲ್ಲ ಓದುಗರಿಗೆ ಸಂಕ್ರಾಂತಿಯ ಶುಭಾಶಯಗಳು

  • (ಬೊಗಳೂರು ಭಯಭೀತ ಬ್ಯುರೋದಿಂದ)
    ಬೊಗಳೂರು, ಜ.14- ಮಾಧ್ಯಮಗಳಿಗೆ ಅಸತ್ಯ ನಿಷಿದ್ಧವೇ ಎಂದು ನಾವು ವಾದ ಮಾಡಲೇಬೇಕಾದ ಕಾಲ ಇಂದು ಸನ್ನಿಹಿತವಾಗಿದೆ. ಮೊನ್ನೆಯೇ ಸನ್ನಿಹಿತವಾಗಿತ್ತಾದರೂ, ಬೇರೆ ಕೆಲಸಗಳಿದ್ದುದರಿಂದ ಇಂದು ಸನ್ನಿಹಿತವಾಗಿದೆ ಅಂತ ತಿಳಿದುಕೊಳ್ಳುತ್ತಿದ್ದೇವೆ.

    ಇಂಥದ್ದೊಂದು ಕಿರಿಕಿರಿ ಚರ್ಚೆಗೆ ಒಗ್ಗರಣೆ ಹಾಕಿದ್ದು ಇಲ್ಲಿ ಮೂಡಿ ಬಂದ ವರದಿ. ಇದನ್ನು ನಾವು ಇಲ್ಲಿ ವಾದಿಸಿ, ತುಂಡಿಸಿ, ತಿರುಚಿ ನಮ್ಮ ಅಪ-ವಾದವನ್ನು ಮಂಡಿಸುತ್ತಿದ್ದೇವೆ.

    ಹೌದು. ಯಾವುದೇ ಮಾಧ್ಯಮಗಳಲ್ಲಿ ಪರ-ವಿರೋಧಗಳಿರುವುದು ಸಹಜ. ಆದರೆ ಅಸತ್ಯವನ್ನು ನಿರ್ಲಕ್ಷಿಸುವುದು ಖಂಡಿತಾ ಸಲ್ಲದು. ಆದರೂ ಕೆಲವೊಂದು ಮಾಧ್ಯಮಗಳು ಅಸತ್ಯವನ್ನು ನಿರಾಕರಿಸುವ ಪರಿಪಾಠ ಬೆಳೆಸಿಕೊಂಡಿರುವುದು ಈ ಅಸತ್ಯದ ತತ್ವ ಸಿದ್ಧಾಂತಕ್ಕೆ ಬದ್ಧರಾಗಿರುವ ನಮಗೆ ಶೋಚನೀಯ ಸಂಗತಿ. ಹಾಗಾಗಿ ನಾವೂ ಕೇಳುತ್ತಿದ್ದೇವೆ- ಮಾಧ್ಯಮಗಳಿಗೆ ಅಸತ್ಯ ನಿಷಿದ್ಧವೇ?

    ಜಾರಕಾರಣಿಗಳಿಗೆ ಸಾರ್ವತ್ರಿಕವಾಗಿ ಮತ್ತು ಸದಾಕಾಲ ಅಪ್ರಿಯವಾದ ಸತ್ಯವನ್ನು ನಾವೇಕೆ ಅನುಸರಿಸಬೇಕು? ಅಸತ್ಯವನ್ನೇ ಯಾವತ್ತೂ ನಾವೇಕೆ ಅನುಸರಿಸಬಾರದು? ಜಾರಕಾರಣಿಗಳ ಬಾಯಲ್ಲಿ ಯಾವತ್ತೂ ನಲಿದಾಡುತ್ತಿರುವ ಈ ಅಸತ್ಯವನ್ನು ನಾವೇಕೆ ನಿಷೇಧಿಸಬೇಕು?

    ಒಟ್ಟಿನಲ್ಲಿ ಈ ರೀತಿ ಅಸತ್ಯ ನಿಷಿದ್ಧವೇ ಎಂದು ಪ್ರಶ್ನೆ ಹುಟ್ಟುಹಾಕುವ ಮೂಲಕ ಅಸತ್ಯಾನ್ವೇಷಣೆಯಲ್ಲಿರುವ ಬೊಗಳೆ ರಗಳೆಯ ಅಸ್ತಿತ್ವವನ್ನೇ ನಾಶ ಪಡಿಸುವ ಸಂಚುಗಳ ಎಲ್ಲಾ ಲಕ್ಷಣಗಳೂ ಗೋಚರಿಸುತ್ತಿವೆ. "ಅಸತ್ಯ ವಾಕ್ಯಕೆ ತಪ್ಪಿ ನಡೆದರೆ ಮೆಚ್ಚನಾ ಪರಮಾತ್ಮನು" ಅಂತ ಹಿರಿಯರೇ ಹೇಳಿದ್ದಾರೆಂಬುದನ್ನು ಹೇಳಿಕೊಳ್ಳುತ್ತಾ ತಿರುಗಾಡುತ್ತಿರುವ ಬ್ಯುರೋ ಸಿಬ್ಬಂದಿಯನ್ನು ಅಲುಗಾಡಿಸಿ ಲಗಾಡಿ ತೆಗೆಯುವ ಪ್ರಯತ್ನವೇ ಇದು?

    ಇದೀಗ ಕರುನಾಟಕ ದೇಶದೊಳ್ ಚುನಾವಣೆಗಳು ಕೂಡ ಹತ್ತಿರ ಬರುತ್ತಾ ಇದೆ. ಇಂಥ ಸಂದರ್ಭದಲ್ಲಿ ಅಸತ್ಯ ನಿಷೇಧಿಸಿದಲ್ಲಿ ಒಬ್ಬೇ ಒಬ್ಬ ಜಾರಕಾರಣಿಯೂ ಆರಿಸಿ ಬರುವುದು ಸಾಧ್ಯವಿಲ್ಲ. ಜಾರಕಾರಣಿಗಳ ಬಾಯಿಂದ ಪುಂಖಾನುಪುಂಖವಾಗಿ ಉದುರುವ ಅಸತ್ಯ ವಾಕ್ಯಗಳನ್ನು ಹೆಕ್ಕಿಕೊಂಡು ಪ್ರಕಟಿಸದಿದ್ದರೆ, ಅವರ ಗತಿ ಏನಾಗಬೇಡ? ನಮಗೊಂದು ಅಸತ್ಯಮೇವ ಜಯತೇ ಎಂಬ ಲೋಗೋವುಳ್ಳ ಸರಕಾರವಾದರೂ ಬೇಡವೇ? ಇದನ್ನೆಲ್ಲಾ ಯಾರೂ ಯಾಕೆ ಅರ್ಥ ಮಾಡಿಕೊಳ್ಳುತ್ತಿಲ್ಲ ಎಂಬುದು ಕಳವಳದ ಸಂಗತಿ.

    "...ಸತ್ಯಮಪ್ರಿಯಂ" ಅಂತಲೂ ನಮ್ಮ ಹಿರಿಯರು ಹೇಳಿದ್ದಾರೆ. ಸತ್ಯ ಯಾವಾಗಲೂ ಅಪ್ರಿಯವಾಗಿರುತ್ತದೆ. ಹಾಗಾಗಿ ಅಪ್ರಿಯವಾದುದನ್ನು ಪ್ರಕಟಿಸಿ ಜನರ ಮನಸ್ಸನ್ನೇಕೆ ಕೆಡಿಸಬೇಕು? ಇಲ್ಲಿ ಕೆಲವು ಮಾಧ್ಯಮಗಳು ಸತ್ಯವನ್ನು ನಿರಾಕರಿಸುವ ಪರಿಪಾಠ ಬೆಳೆಸಿಕೊಂಡಿದೆ ಎಂದು ಹೇಳಿರುವುದು ಬೊಗಳೆರಗಳೆಯನ್ನು ಉದ್ದೇಶಿಸಿಯೇ ಹೇಳಿರಬಹುದಾಗಿದೆ ಎಂದು ನಾವು ಹೆಗಲು ಮುಟ್ಟಿ ತಟ್ಟಿಕೊಳ್ಳುತ್ತಿದ್ದೇವೆ. ಇದು ಬೊಗಳೆ ರಗಳೆ ವಿರುದ್ಧ ಷಡ್ಯಂತ್ರವಾಗಿದ್ದು, ಈ ಬಗ್ಗೆ ಅಸತ್ಯಪ್ರಿಯರೆಲ್ಲರೂ ಎಷ್ಟೇ ಜೋರು ನಿದ್ದೆ ಬಂದರೂ ಎಚ್ಚರಿಕೆಯಲ್ಲಿರಬೇಕು ಎಂದು ಕರೆ ನೀಡಲಾಗುತ್ತಿದೆ. ನಿದ್ದೆಗೆಟ್ಟವರೆಲ್ಲರೂ ಆ ನಿದ್ದೆಯನ್ನು ಮರುದಿನಕ್ಕೆ ಮುಂದೂಡಿಯಾದರೂ ಪ್ರತಿ ದಿನ ಎಚ್ಚರಿಕೆಯಲ್ಲಿರುವಂತೆ ಬ್ಯುರೋ ಕರೆ ನೀಡಿದೆ.

    Thursday, January 10, 2008

    ಭಜ್ಜಿಗೆ ಶಿಕ್ಷೆ ಪೂರ್ವಜರನ್ನು ನೆನಪಿಸಿದ್ದಕ್ಕಾಗಿಯೇ?

    (ಬೊಗಳೂರು ಶಂಕಾಸ್ಪದ ಬ್ಯುರೋದಿಂದ)
    ಬೊಗಳೂರು, ಜ.10- ಮಂಗನಿಂದ ಮಾನವ ಎಂದು ಗೊತ್ತಿದ್ದೂ, ಮಾನವನಿಂದಲೇ ಮಂಗ ಎಂದುಕೊಳ್ಳುವವರಿಗೇನೂ ಕೊರತೆಯಿಲ್ಲ. ಆದರೆ ಈ ಮಂಗವೇ ವಿವಾದಕ್ಕೆ ಕಾರಣವಾಗುತ್ತದೆ ಎಂಬ ಹಿನ್ನೆಲೆಯಲ್ಲಿ ಪ್ರಾಣಿಗೇನೋ ಅನ್ಯಾಯವಾಗ್ಬಿಟ್ಟಿದೆ ಅಂತ ಸಿಡ್ನಿಗೆ ತೆರಳಿದಾಗ ಅಸತ್ಯ ವಿಷಯ ಬಹಿರಂಗವಾಗಿತ್ತು.

    ಭಜ್ಜಿಯು ಯಾರನ್ನು ಮಂಗ ಮಾಡಿದ್ದು ಮತ್ತು ಮಂಗನು ಯಾವುದನ್ನು ಜಜ್ಜಿ ಜಜ್ಜಿ ಬಜ್ಜಿ ಮಾಡಿದ್ದು ಅಂತ ಗೊಂದಲದಲ್ಲಿ ಸಿಲುಕಿರುವ ಓದುಗರ ಗೊಂದಲ ಮತ್ತಷ್ಟು ಹೆಚ್ಚಿಸುವ ಪ್ರಯತ್ನವೇ ಈ ವರದಿ ಎಂದು ಬೊಗಳೆ ರಗಳೆ ಬ್ಯುರೋ ಸ್ಪಷ್ಟಪಡಿಸುತ್ತಿದೆ.

    ಆದರೆ ಇಲ್ಲಿ ಮಂಗ ಯಾರು ಎಂಬುದೇ ಗೊಂದಲಕ್ಕೆ ಕಾರಣವಾದ ಪ್ರಧಾನ ಅಂಶ. ಹಲವು ಶಂಕೆಗಳನ್ನು ಇಲ್ಲಿ ಪಟ್ಟಿ ಮಾಡಲಾಗಿದೆ. ಔಟಾಗದಿದ್ದರೂ ತೋರ್‌ಬೆರಳು ಎತ್ತದೇ ಇರುವವರೋ ಅಥವಾ ಔಟಾಗಿಯೂ ಬೆರಳೆತ್ತದವರೋ... ಅಥವಾ ಹಿಡಿದ ಚೆಂಡನ್ನು ನೆಲಕ್ಕೆ ತಾಗಿಸಿಯೂ ಔಟ್ ಅಂದವರೋ, ಅಂಪೈರಿಗೆ ಒಂದು ಬೆರಳೆತ್ತಿ ಸೂಚನೆ ನೀಡಿ ನಮ್ಮ ಕ್ಲರ್ಕು ಮಾಡಿದ್ದೇ ಸರಿ ಅಂತಂದವರೋ...ಔಟಾಗಿದ್ದು ಗೊತ್ತಾದರೂ ಅಂಪೈರು ಕೊಡಲಿಲ್ಲ ಅಂತ ಆಟ ಮುಂದುವರಿಸಿ ಸೆಂಚುರಿ ಗಡಿ ದಾಟಿದವರೋ,. ಮಾತನಾಡಿದ್ದಕ್ಕೇ ವಿನಾಕಾರಣ, ತಮ್ಮ ಜನಾಂಗವನ್ನೇ ನಿಂದಿಸಿದರು ಅಂತ ದೂರಿತ್ತವರೋ...

    ಇಂಥ ಶಂಕೆಗಳಿಗೆ ಕಾರಣರಾದವರನ್ನು ಮಂಗ ಎಂದು ಹೇಳಿದರೆ ಮಂಗ ಜಾತಿಗೇ ಅವಮಾನವಾಗುತ್ತದೆ ಎಂಬುದಾಗಿ ಕಾಂಗರೂ ನಾಡಿಗೆ ಪ್ರವಾಸ ತೆರಳುವ ಮುನ್ನವೇ ಮಂಗ ಜಾತಿಯವರು ಈ ಮೊದಲೇ ನಮ್ಮ ಬ್ಯುರೋಗೆ ಅನಧಿಕೃತ ಮತ್ತು ಅನೌಪಚಾರಿಕ ಭೇಟಿ ಎಚ್ಚರಿಸಿಹೋಗಿದ್ದವು. ಹಾಗಾಗಿ ನಾವು ಇದುವರೆಗೆ ಬಾಯಿ ಮುಚ್ಚಿಕೊಂಡಿರಬೇಕಾಗಿತ್ತು.

    ಅಂತೆಯೇ, ಭಜ್ಜಿಯು ಪೂಜ್ಯಭಾವದಿಂದಲೇ ಮಂಗ ಅಂತ ಹೇಳಿದ್ದಾರೆ. ಇದು ಜನಾಂಗೀಯ ನಿಂದನೆಯಲ್ಲ. ಅದು ಅವರ ಪೂರ್ವಜರನ್ನು ನೆನಪಿಸುವುದು ಅಷ್ಟೇ ಎಂಬುದನ್ನು ಕಂಡುಕೊಳ್ಳಲಾಗಿದೆ. ಪೂರ್ವಜರ ಸ್ಮರಣೆ ಯಾವತ್ತೂ ಅತ್ಯಂತ ಮುಖ್ಯ. ಆದರೆ ಸುಮ್ಮನೇ ಮಾತನಾಡಿದಾಗ, ಒಮ್ಮೆಲೇ ಆಕ್ರೋಶಗೊಂಡು "ಟೀಚರ್... ಇಂವ ನನ್ನನ್ನು ಚಿವುಟಿದ... ಇಂವ ನನಗೆ ಬೈದ" ಅಂತ ಮೇಷ್ಟ್ರಲ್ಲಿ ದೂರು ಕೊಟ್ಟು, ಅವನನ್ನು ಶಾಲೆಯಿಂದಲೇ ಹೊರಗೆ ಹಾಕಿಸುವ ಪ್ರಯತ್ನದ ಬಗ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿರುವ ಕಿರಿಕಿರಿಕೆಟ್ಟಾಟದ ಪ್ರೇಮಿಗಳು, ತಮ್ಮನ್ನು ತಾವೇ ಆ ರೀತಿ ತಿಳಿದುಕೊಳ್ಳುವ ಭ್ರಾಂತಿ ರೋಗವೇ ಇದಕ್ಕೆ ಕಾರಣ ಎಂದು ಸ್ಪಷ್ಟಪಡಿಸಿದ್ದಾರೆ.

    ಏನೇ ಆದರೂ, ಭಜ್ಜಿ ಮಂಗನ ಸುದ್ದಿ ತೆಗೆಯದೇ ಇದ್ದರೆ ಒಳ್ಳೆಯದೇ. ಆದರೆ ಎಲ್ಲಾದರೂ ಭಜ್ಜಿಯ ಬಾಯಿಂದ ಈ ಮಾತು ಉದುರಿದ್ದರೆ ಅದೇನೂ ಜನಾಂಗೀಯ ನಿಂದನೆಯಲ್ಲ, ತಮ್ಮದೇ ಜನಾಂಗದ ಬಗ್ಗೆ ನಾವು ಮಾತನಾಡಿಕೊಳ್ಳುವುದರಲ್ಲಿ ತಪ್ಪೇನಿಲ್ಲ ಎಂದೂ, ದೇವರ ನಾಮಸ್ಮರಣೆಯಿಂದ ಮತ್ತಷ್ಟು ಭಯ, ಭಕುತಿ, ಶಕುತಿ, ಯುಕುತಿ ಎಲ್ಲವೂ ದೊರೆಯುತ್ತದೆಯೆಂದೂ ಬ್ಯುರೋ ತೀರ್ಪು ನೀಡಿದೆ.

    ತೀರಾ ಇತ್ತೀಚೆಗೆ ಆಸ್ಟ್ರೇಲಿಯಾದಿಂದ ಬಂದಿರುವ ಒದರಿಗಳ ಪ್ರಕಾರ, ಆಸ್ಟ್ರೇಲಿಯಾದಲ್ಲಿ ಕೆಲವು ಮಂದಿ ಪಾನಗೋಷ್ಠಿ ರಹಿತ ತುರ್ತು ಪತ್ರಿಕಾಗೋಷ್ಠಿ ಕರೆದು, ತಾವು ಮಂಗ ಅಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

    Monday, January 07, 2008

    ವಿಸ್ಡನ್ ಶ್ರೇಷ್ಠ ಕ್ರಿಕೆಟಿಗ ಪ್ರಶಸ್ತಿ ಅಂಪೈರಿಗೆ!

    (ಬೊಗಳೂರು ಇಲೈಟ್ ಅಂಪೈರು ಬ್ಯುರೋದಿಂದ)
    ಬೊಗಳೂರು, ಜ.7- ಆಸ್ಟ್ರೇಲಿಯಾ ತಂಡದಲ್ಲಿರುವ 12 ಮತ್ತು 13ನೇ ಆಟಗಾರರೇ ಎರಡನೇ ಟೆಸ್ಟ್ ಪಂದ್ಯದಲ್ಲಿ ವಿಶ್ವಚಾಂಪಿಯನ್ನರಿಗೆ ವಿಜಯ ದೊರಕಿಸಿಕೊಟ್ಟಿದ್ದು, ಅವರು ವಿಶ್ವ ಚಾಂಪಿಯನ್ನರೇ ಆಗಿರುತ್ತಾರೆ ಏಕೆಂಬುದು ಮತ್ತೊಮ್ಮೆ ಸಾಬೀತಾಗಿದೆ.

    ಈ ಹಿನ್ನೆಲೆಯಲ್ಲಿ, ಅಂಪೈರಿಂಗು ಮಾಡುತ್ತಲೇ ಉತ್ತಮ ಪೈರು ತೆಗೆಯುತ್ತಾ, ಕಾಂಗರೂ ತಂಡದ 12ನೇ ಆಟಗಾರರಾಗಿರುವ ಬೀವ್ ಸ್ಟಕ್ನರ್ ಅವರನ್ನು ಬೊಗಳೆ ರಗಳೆ ಮಾತನಾಡಿಸಿದಾಗ ಅವರು ತಮ್ಮದೇ ಯೋಚನಾ ಲಹರಿಯನ್ನು ಹರಿಯಬಿಟ್ಟರು. ಅವರದೇ ಮಾತುಗಳಲ್ಲಿ ಕೇಳಿ:

    ಅಂಪೈರುಗಳಿಗೂ ಆಟವಾಡಲು ದೊರೆಯುವ ಅವಕಾಶವನ್ನು ಅಧಿಕೃತಗೊಳಿಸಬೇಕು. ಭಾರತ ತಂಡದವರು ಆಡುತ್ತಿರುವಾಗ ನಮಗೆ ಕೈ ಎತ್ತಿ ಎತ್ತಿ ಸಾಕಾಗಿ ಹೋಗುತ್ತದೆ. ಹಾಗಾಗಿ ಕೆಲವೊಮ್ಮೆ ಬೆರಳು ಎತ್ತುವುದು ಕಷ್ಟವಾಗುತ್ತದೆ ಎಂದು ಅವರು ಒದರಿದ್ದಾರೆ.

    ನಾನು ಕಾಂಗರೋದ್ಧಾರ!

    ಅಂತೆಯೇ, ಶ್ರೀಕೃಷ್ಣ ಪರಮಾತ್ಮನು ಕಿರುಬೆರಳಿನಲ್ಲಿ ಮಂದರಗಿರಿಯನ್ನು ಎತ್ತಿದನಂತೆ. ನಾವೀಗ ವಿಶ್ವಚಾಂಪಿಯನ್ನರನ್ನೇ ಎತ್ತಿಬಿಟ್ಟಿದ್ದೇವೆ. ಕೃಷ್ಣನಿಗೆ ಮಂದರೋದ್ಧಾರ ಎಂಬ ಹೆಸರು ದೊರೆತರೆ, ಸೋಲಿನ ಅಂಚಿನಲ್ಲಿ ಚಡಪಡಿಸುತ್ತಿದ್ದ ನಮ್ಮ ಭಕ್ತರನ್ನು ನಾವು ರಕ್ಷಿಸಿ, ಕಾಂಗರೋದ್ಧಾರ ಎಂಬ ಬಿರುದಿಗೆ ಪಾತ್ರರಾಗಿದ್ದೇವೆ ಎಂದು ಅವರು ಸಮರ್ಥಿಸಿಕೊಂಡರು.

    ಕಣ್ಣು ಪರೀಕ್ಷೆಗೆ ನಿರಾಕರಣೆ

    ಕಣ್ಣು ಪರೀಕ್ಷೆ ಮಾಡಿಸಿಕೊಳ್ಳಬೇಕು ಎಂಬುದಾಗಿ ವಿಶ್ವಾದ್ಯಂತ ಬಂದಿರುವ ಆಗ್ರಹಗಳನ್ನು ಖಡಾಖಂಡಿತವಾಗಿ, ಕಡ್ಡಿ ಮುರಿದಂತೆ ತುಂಡು ಮಾಡುತ್ತಾ ನಿರಾಕರಿಸಿರುವ ಬೀವ್ ಸ್ಟಕ್ನರ್ ಅವರು, ನಮ್ಮ ಕಣ್ಣು ಸರಿಯಾಗಿಯೇ ಇದೆ. ರಿಕಿ ಪಾಂಟಿಂಗಿಗೆ, ಮೈಕ್ ಹಸ್ಸೇಗೆ ನಾವು ಔಟ್ ಕೊಟ್ಟಿದ್ದೇವೆಯೇ? ಚೆಂಡು ಇಬ್ಬರ ಬ್ಯಾಟಿಗೂ ತಗುಲಿ, ಅದನ್ನು ಭಾರತೀಯರು ಕ್ಯಾಚ್ ಹಿಡಿದಿದ್ದರು. ಆಗ ನಾನು ಔಟ್ ಕೊಟ್ಟಿರಲಿಲ್ಲವಲ್ಲ. ಹಾಗಾಗಿ ನನ್ನ ಕಣ್ಣು ಸರಿಯಾಗಿಯೇ ಇದೆ ಎಂದು ಸಮರ್ಥಿಸಿಕೊಂಡರು.

    ದ್ರಾವಿಡ್ ಮತ್ತು ಗಂಗೂಲಿ ಅವರ ಬ್ಯಾಟಿಗೆ ಚೆಂಡು ತಗುಲಿರಲೇ ಇಲ್ಲವಾದರೂ, ಅದನ್ನು ನಾನೀಗ ಚೆಂಡು ಬ್ಯಾಟಿಗೆ ತಗುಲಿದೆ ಎಂದೇ ಸಮರ್ಥಿಸಿಕೊಳ್ಳಬೇಕಾಗಿದೆ ಎಂದು ಪರದಾಡಿದ ಅವರು, ನಾನು ಐಸಿಸಿ ಇಲೈಟ್ ಪ್ಯಾನೆಲ್ ಸದಸ್ಯ. ಏನು ಮಾಡಿದರೂ ನಡೆಯುತ್ತದೆ ಎಂದು ಕಪ್ಪು ಹಾಗೂ ಹ್ಯಾಪು ಮೋರೆಯಲ್ಲಿ ಕಾಣಿಸುತ್ತಿದ್ದ ಏಕೈಕ ವಸ್ತುಸಮೂಹವಾದ ಹಲ್ಲುಗಳನ್ನು ತೋರಿಸುತ್ತಾ ನುಡಿದರು.

    12, 13ನೇ ಆಟಗಾರರಿಗೂ ಪಂದ್ಯಶ್ರೇಷ್ಠ, ಸರಣಿ ಶ್ರೇಷ್ಠ

    ತಮ್ಮ ಆಟವನ್ನು ಮೆಚ್ಚಿ ತಮಗೇ ಪಂದ್ಯಶ್ರೇಷ್ಠ ಮತ್ತು ಸರಣಿ ಶ್ರೇಷ್ಠ ಪ್ರಶಸ್ತಿಗಳನ್ನು ನೀಡುವಂತೆ ಆಗ್ರಹಿಸಿದ ಅವರು, ಅಂಪೈರುಗಳನ್ನು ಇವರೆಲ್ಲಾ ಏನೂಂತ ತಿಳಿದಿದ್ದಾರೆ. ನಾವು ಕೂಡ ಪಂದ್ಯ ಗೆಲ್ಲಿಸಿಕೊಡಬಲ್ಲೆವು ಎಂಬುದು ಇದರಿಂದ ಸಾಬೀತಾಗಲಿಲ್ಲವೇ ಎಂದು ಪ್ರಶ್ನಿಸಿದರು.

    ಅಂಪೈರುಗಳಿಗೆ ಶ್ರೇಷ್ಠ ಕ್ರಿಕೆಟಿಗ ವಿಸ್ಡನ್ ಪುರಸ್ಕಾರ

    ಈ ಹಿನ್ನೆಲೆಯಲ್ಲಿ, ಅಂಪೈರು ಬೀವ್ ಸ್ಟಕ್ನರ್ ಮೇಲೆ ಕಣ್ಣಿಟ್ಟಿರುವ ಬೊಗಳೆ ರಗಳೆ ಬ್ಯುರೋ, ಮುಂದಿನ ದಿನದ ಪಂದ್ಯಗಳಲ್ಲೂ ಇವರು ತಮ್ಮ ದಾಖಲೆಯನ್ನು ಮತ್ತಷ್ಟು ಉತ್ತಮಪಡಿಸಿಕೊಳ್ಳಲಿ. ಅವರಿಗೆ ವಿಸ್ಡನ್ ವರ್ಷದ ಶ್ರೇಷ್ಠ ಕ್ರಿಕೆಟಿಗ ಪ್ರಶಸ್ತಿಯನ್ನು ದೊರಕಿಸಿಕೊಡಲು ತೀವ್ರ ಹೆಣ-ಗಾಟ ನಡೆಸುವುದಾಗಿ ಶಪಥ ತೊಟ್ಟಿದೆ. ಈ ಮೂಲಕ, ಕಣ್ಣು ಕಾಣಿಸದ, ಅಕ್ಷರಶಃ ವಿಕಲಾಂಗ ಅಂಪೈರುಗಳು ಕೂಡ ಜೀವಮಾನ ಶ್ರೇಷ್ಠ ಪುರಸ್ಕಾರ ಪಡೆಯುವಂತಾಗಬೇಕು ಎಂಬುದು ನಮ್ಮ ಬ್ಯುರೋದ ಕಳಕಳಿ.

    ಸ್ಪಿನ್ನರುಗಳಿಗೆ ಶಾಶ್ವತ ನಿಷೇಧ: ಕಾಂಗರೂ ನಾಯಕ ಆಗ್ರಹ

    ಈ ನಡುವೆ, ಭಾರತ ಉಪಖಂಡದ (ಭಾರತದ ಕುಂಬ್ಳೆ, ಹರಭಜನ್, ಶ್ರೀಲಂಕಾದ ಮುರಳೀಧರನ್, ಪಾಕಿಸ್ತಾನದ ಅಬ್ದುಲ್ ಖಾದಿರ್) ಸ್ಪಿನ್ನರುಗಳನ್ನು ಎದುರಿಸಲು ಯಾವತ್ತೂ ಹೆಣಗಾಡುತ್ತಿದ್ದ ಕಾಂಗರೂಗಳು, ಸ್ಪಿನ್ನರುಗಳನ್ನು ಎದುರಿಸಲು ಕಂಡುಕೊಂಡ ಮಾರ್ಗಕ್ಕೆ ವಿಶ್ವಾದ್ಯಂತ ಶ್ಲಾಘನೆ ವ್ಯಕ್ತವಾಗಿದೆ. ಚೆನ್ನಾಗಿ ಸ್ಪಿನ್ ಬೌಲಿಂಗ್ ಮಾಡುತ್ತಿದ್ದರೆ ಅವರ ಮೇಲೆ ಚಕ್ಕಿಂಗ್ ಮಾಡುವ, ಜನಾಂಗೀಯ ನಿಂದನೆಯ ಆರೋಪ ಹೊರಿಸಿದಲ್ಲಿ, ಅವರು ಮುಂದಿನ ಯಾವುದೇ ಟೆಸ್ಟ್ ಪಂದ್ಯಗಳಿಗೆ ನಿಷೇಧಕ್ಕೊಳಗಾಗುತ್ತಾರೆ. ಇದರಿಂದ ಅವರ ತಂಡವನ್ನು ಎದುರಿಸುವುದು ಮತ್ತಷ್ಟು ಸುಲಭ ಎಂದು 9ನೇ ಬಾರಿಗೆ ಹರಭಜನ್ ಸ್ಪಿನ್‌ಗೇ ಬಲಿಯಾದ ಕಾಂಗರೂ ನಾಯಕ ಪಿಟಿ ರಾಂಕಿಂಗ್ ಹೇಳಿದ್ದಾರೆ.

    ಅಲ್ಲದೆ, ಪಾಪದ ಕಾಂಗರೂಗಳನ್ನು ಕಾಡುವ ಸ್ಪಿನ್ನರುಗಳಿಗೆ ಆಜೀವ ನಿಷೇಧವಾಗಬೇಕು, ಅವರ ಮೇಲೆ "ಪಾಪ"ದ ಪ್ರಾಣಿಗಳಿಗೆ ಕಿರುಕುಳ ನೀಡುವ ಆರೋಪ ಹೊರಿಸಿ ಕೇಸು ಜಡಿಯಬೇಕು ಎಂದು ಅವರು ಆಗ್ರಹಿಸಿದ್ದಾರೆ.

    Saturday, January 05, 2008

    ಬೊಗಳೆ ಓದುವ ಉಪರಾಷ್ಟ್ರಪತಿ !

    (ಬೊಗಳೂರು ಅಪ್ಪಟ ಬೊಗಳೆ ಬ್ಯುರೋದಿಂದ)
    ಬೊಗಳೂರು, ಜ.5- ಬೊಗಳೆ ರಗಳೆ ಪತ್ರಿಕೆಯನ್ನು ನಮ್ಮ ದೇಶದ ಉಪರಾಷ್ಟ್ರಪತಿಗಳೂ ಓದುತ್ತಾರೆ ಎಂಬುದು ದೃಢವಾಗಿದೆ. ಈ ವಿಷಯವನ್ನು ನಾವೇ ಪತ್ತೆ ಮಾಡಿದ್ದು, ನಮಗೆ ಈ ವಿಷಯ ತಿಳಿದುಬರಲು ಕಾರಣವೆಂದರೆ ಇಲ್ಲಿ ಪ್ರಕಟವಾಗಿರುವ ವರದಿ!

    ಇದರಲ್ಲಿ ನಮ್ಮ ವಿರೋಧಿ ಪತ್ರಿಕೆಗಳ ಕುತಂತ್ರವಿದೆ ಎಂಬ ಶಂಕೆ ನಮಗೆ ಆರಂಭವಾಗಿದೆ. ತೀವ್ರವಾಗಿ ಇಳಿಕೆಗತಿಯಲ್ಲಿ ಸಾಗುತ್ತಿರುವ ನಮ್ಮ ಪತ್ರಿಕೆಯ (ಅಪ)ಪ್ರಸಾರ ಸಂಖ್ಯೆಯನ್ನು ಒಂದಕ್ಕೆ ಏರಿಸುವ ಕುತಂತ್ರದ ಫಲವೇ ಇದು ಎಂದು ಬೊಗಳೆಯ ಅಸತ್ಯಾನ್ವೇಷಣಾ ಬ್ಯುರೋ ಕಂಡುಕೊಂಡಿದೆ.

    ಉನ್ನತ ಹುದ್ದೆಯಲ್ಲಿರುವ ವ್ಯಕ್ತಿಗಳ ಬಾಯಲ್ಲಿ ಈ ಹೇಳಿಕೆಯನ್ನೇಕೇ ಹೇಳಿಸಬೇಕಿತ್ತು ಎಂಬುದನ್ನು ತಿಳಿಯದೆ ಚಡಪಡಿಸುತ್ತಿದ್ದ ಸೊಂಪಾದ-ಕರುಗಳೆಲ್ಲಾ ಒಟ್ಟಾಗಿ ಈ ತೀರ್ಮಾನಕ್ಕೆ ಬಂದಿವೆ ಎಂದು ತಳ ಮತ್ತು ಬುಡವಿಲ್ಲದ ಸುದ್ದಿಯ ಮೂಲಗಳು ತಿಳಿಸಿವೆ.

    ಅಂದರೆ ಇದುವರೆಗೆ ಒಂದಕ್ಕಿಂತ ಕಡಿಮೆ ಇದ್ದ ಓದುಗರ ಸಂಖ್ಯೆಯು ಉಪರಾಷ್ಟ್ರಪತಿಗಳ ಓದುವಿಕೆಯಿಂದಾಗಿ ಒಂದಕ್ಕೆ ಏರಿರುವುದು ಖಚಿತಪಟ್ಟಂತಾಗಿದೆ. ಒಂದಕ್ಕೇ ಅವರು ಈ ರೀತಿಯ ಹೇಳಿಕೆ ನೀಡಬಾರದಿತ್ತು ಎಂಬುದು ನಮ್ಮ ಬ್ಯುರೋವನ್ನು ಕಾಡಿದ ಅಂಶವಾಗಿದೆ.

    Thursday, January 03, 2008

    ಸುದ್ದಿಯೇ ಆಗದ ಬಿಳಿಯಾನೆಗಳ ಭೇಟಿ !

    (ಬೊಗಳೂರು ಬಿಳಿಯಾನೆ ಬ್ಯುರೋದಿಂದ)
    ಬೊಗಳೂರು, ಜ.3- ಆನೆಯೊಂದು ಹೋಟೆಲ್‌ಗೆ ಭೇಟಿ ನೀಡಿದ್ದನ್ನೇ ದೊಡ್ಡ ಸುದ್ದಿಯಾಗಿ ಇಲ್ಲಿ ಚಿತ್ರ ಸಮೇತ ಪ್ರಕಟಿಸಲಾಗಿದ್ದು, ಇದರ ಔಚಿತ್ಯವನ್ನು ಬೊಗಳೆ ರಗಳೆ ಪ್ರಶ್ನಿಸಿದೆ.

    ಈ ರೀತಿ ಔಚಿತ್ಯ ಪ್ರಶ್ನಿಸುವುದಕ್ಕಾಗಿ ಹಲವಾರು ಕಾರಣಗಳಿವೆ. ಯಾಕೆಂದರೆ ಎಲ್ಲೆಡೆ ಬಿಳಿಯಾನೆಗಳು ಜನಸಾಮಾನ್ಯರ ಹೋಟೆಲ್, ಅಂಗಡಿಗಳಿಗೆ ಭೇಟಿ ನೀಡುತ್ತಾ, ಅವರನ್ನು ಹಿಂಡಿ ತಿನ್ನುವುದನ್ನು ನಾವು ಸಾಮಾನ್ಯವಾಗಿ ಕಾಣುತ್ತೇವೆ, ಕೇಳುತ್ತೇವೆ ಮತ್ತು ಓದುತ್ತೇವೆ. ಹಾಗಾಗಿ ಕಪ್ಪಾನೆಯೊಂದು ಹೋಟೆಲಿಗೆ ಭೇಟಿ ನೀಡುವುದು ದೊಡ್ಡ ಸುದ್ದಿಯೇ ಅಲ್ಲ ಎಂಬುದು ಬೊಗಳೆ ಬ್ಯುರೋ ವಾದವಾಗಿದೆ.

    ಈ ಕಪ್ಪಾನೆಯು ನೂರು ಇಡ್ಲಿ ಮತ್ತು ಬಾಳೆ ಹಣ್ಣು ಇತ್ಯಾದಿಗಳನ್ನಷ್ಟೇ ನುಂಗಿದೆ. ಆದರೆ ಬಿಳಿಯಾನೆಗಳು, ರೈತರು, ಬಡವರ ಜೇಬಿಗೂ ಸೊಂಡಿಲು ತೂರಿಸಿ, ನಯಾ ಪೈಸೆ ಇದ್ದರೂ ಕಬಳಿಸುತ್ತವೆ. ಇದಲ್ಲದೆ, ಯಾವುದೇ ಕೆಲಸ ಮಾಡಬೇಕಿದ್ದರೂ ಹಣ ನುಂಗುತ್ತವೆ, (ವಿರೋಧಿಗಳ ಪರ) ಕೆಲಸ ಮಾಡುವುದು ಬೇಡವಾಗಿದ್ದರೂ ಹಣ ನುಂಗುತ್ತವೆ.

    ಇದೂ ಅಲ್ಲದೆ, ಈ ಕಪ್ಪಾನೆಯನ್ನು ನಾಯಿ ಅಟ್ಟಾಡಿಸಿಕೊಂಡು ಓಡಿಸಿತು ಎಂದೂ ವರದಿ ಮಾಡಲಾಗಿದೆ, ಆದರೆ ಬಿಳಿಯಾನೆಗಳು ಕೂಡ ಅಲ್ಲಲ್ಲಿ ಮೂಗು ತೂರಿಸಿ, ಮನುಷ್ಯರಿಂದಲೇ ಓಡಿಸಿಕೊಂಡ ಪ್ರಸಂಗಗಳೆಷ್ಟಿಲ್ಲ? ಅವುಗಳನ್ನೆಲ್ಲಾ ಸುದ್ದಿ ಮಾಡುವುದಿಲ್ಲವೇಕೆ ಎಂಬುದು ಬೊಗಳೆಗೆ ಹೊಳೆಯದ ರಗಳೆ.

    ಈ ರೀತಿಯಾಗಿ ಕುಳಿತಲ್ಲೇ ಸೂಟುಕೇಸುಗಟ್ಟಲೆ ಕಬಳಿಸುವ ಬಿಳಿಯಾನೆಯ ಒಂದಾದರೂ ಚಿತ್ರವನ್ನು ಪೇಪರಿನಲ್ಲಿ ಪ್ರಕಟಿಸಿದ್ದಾರಾ? ಅಪ್ಪಿ ತಪ್ಪಿ, ಅತ್ಯಂತ ಅಪರೂಪದ ಪ್ರಕರಣಗಳಲ್ಲಿ ಈ ಬಿಳಿಯಾನೆಗಳನ್ನು ಬೋನಿನಲ್ಲಿ ಕೂಡಿ ಹಾಕಿದ್ದರೂ, ಅವುಗಳು ಅದು ಹೇಗೋ ತಕ್ಷಣ ಹೊರಬಂದು ಮತ್ತದೇ ಕಬಳಿಸುವಿಕೆಯಲ್ಲಿ ತೊಡಗುತ್ತಿರುತ್ತವೆ. ಇತ್ತೀಚೆಗೆ ಕರ್ನಾಟಕದಲ್ಲಂತೂ ಬಿಳಿಯಾನೆಗಳ ಹಾವಳಿ ಸಾಕಷ್ಟು ಹೆಚ್ಚಾಗಿದ್ದು, ಬಡ ತೆರಿಗೆದಾರ ತಲೆ ಮೇಲೆ ಕೈಹೊತ್ತು ಕುಳಿತಿರುವುದಾಗಿ ವರದಿಯಾಗಿದೆ.

    ಈ ಬಿಳಿಯಾನೆಗಳಿಗೆ ಕೆಲಸ ಮಾಡಿದರೂ ಬೊಕ್ಕಸದಿಂದ ಪಗಾರ ಬರುತ್ತದೆ, ಕೆಲಸ ಮಾಡದೇ ಇದ್ದರೂ ಬರುತ್ತದೆ. ಆದರೆ ಅದು ಕೂಡ ಸಾಕಾಗುವುದಿಲ್ಲ ಎಂಬುದು ಅವುಗಳ ಸೊಂಡಿಲು ಬಡ ಬೋರೇಗೌಡನ ಹರಿದ ಜೇಬಿನೊಳಕ್ಕೆ ತೂರಿದಾಗಲೇ ಗೊತ್ತಾಗುತ್ತದೆ. ಹಾಗಾಗಿ ಈ ಬಿಳಿಯಾನೆಗಳಿಗೂ ಪ್ರಚಾರ ನೀಡಬೇಕು, ಅವುಗಳನ್ನೂ ಜನಪ್ರಿಯವಾಗಿಸಬೇಕು, ಅವುಗಳ ಚಿತ್ರವನ್ನೂ ಪ್ರಕಟಿಸಿ ಧನ್ಯರಾಗಬೇಕು ಎಂದು ತಮ್ಮ ವಿರೋಧಿ ಪತ್ರಿಕೆಗಳಿಗೆ ಬೊಗಳೆ ರಗಳೆ ಬ್ಯುರೋ ಕರೆ ನೀಡಿದೆ. ಆದರೆ ಇದನ್ನು ಕೆರ ನೀಡಿದೆ ಎಂದು ತಪ್ಪಾಗಿ ಓದಿಕೊಳ್ಳಬಾರದೆಂದು ನಮ್ಮ ಬ್ಯುರೋ ದಯನೀಯವಾಗಿ ಅಂಗಲಾಚಿಕೊಳ್ಳುತ್ತಿದೆ.

    ಕೊನೆಯದಾಗಿ, ಇತ್ತೀಚೆಗೆ ಬಿಳಿ ಬಿಳಿಯಾಗಿರುವ ನಿಧಾನಸೌಧದಿಂದ ಬಿಳಿಯಾನೆಗಳೆಲ್ಲಾ ನಾಪತ್ತೆಯಾಗಿವೆ. ಅಲ್ಲಿ ಅವುಗಳ ಘೀಳಿಡುವಿಕೆ ಕೇಳಿಸುತ್ತಿಲ್ಲ. ಏನಿದ್ದರೂ ಈಗ ನಾಡಿನಲ್ಲಿ ತಿರುಗಾಡುತ್ತಿರುವ ಅವುಗಳು, ಘೀಳಿಡುವ ಬದಲು ಕುಂಯ್‌ಗುಡುತ್ತಿವೆ ಎಂಬುದನ್ನು ಅಲ್ಲಲ್ಲಿ ನೇಮಿಸಿರುವ ನಮ್ಮ ಗುಪ್ತ ಮೂಲಗಳು ಒದರಿ ಮಾಡಿವೆ.

    Tuesday, January 01, 2008

    ನ್ಯೂ ಇಯರ್ : ಬೊಗಳೆ ರಿಸೊಲ್ಯುಶನ್!

  • ಬೊಗಳೆಯ ಎಲ್ಲ ಓದುಗರಿಗೂ, ಬ್ಯುರೋ ಸಿಬ್ಬಂದಿಯನ್ನು ಅತ್ತಿಂದಿತ್ತ ಓಡಿಸುವವರಿಗೂ, ಕ್ರಿಸ್ಮಸ್ ಮತ್ತು ಹೊಸ ವರ್ಷದ ಶುಭಾಶಯಗಳು

  • ಬೊಗಳೂರು ನಿಯಮ ಮುರಿಯೋ ಬ್ಯುರೋದಿಂದ)
    ಬೊಗಳೂರು, ಜ.1- ನಿಯಮಗಳಿರುವುದೇ ಮುರಿಯಲಿಕ್ಕಾಗಿ ಎಂಬ ಪಕ್ಕಾ ರಾಜಕೀಯ Resolution ನೊಂದಿಗೆ ಬೊಗಳೆ ರಗಳೆ ಬ್ಯುರೋ ಹೊಸ ವರುಷವನ್ನು ಸ್ವಾಗತಿಸಿದೆ.

    ಅದರ ಆರಂಭಿಕ ಹೆಜ್ಜೆಯಾಗಿ, ಹೊಸ ವರ್ಷಕ್ಕೆ ಹೊಸ ಸಂಕಲ್ಪ ಕೈಗೊಳ್ಳಬೇಕು ಎಂದು ನಮ್ಮ ಬ್ಯುರೋ ನಿರ್ಧರಿಸಿತ್ತು. ಅದರ ಗತಿ ಏನಾಗಿದೆ ಎಂಬುದು ನಮ್ಮೆಲ್ಲಾ ಓದುಗರಿಗೆ ಈಗಾಗಲೇ ಮನದಟ್ಟಾಗಿರಬಹುದು ಎಂಬ ದೃಢ ವಿಶ್ವಾಸ ನಮಗಿದೆ. ತತ್ಪರಿಣಾಮವೇ, ಹೊಸ ನಿರ್ಧಾರವೂ ಇಲ್ಲ, ಅದನ್ನು ಪಾಲಿಸಬೇಕಾದ ಅನಿವಾರ್ಯತೆಯೂ ಇಲ್ಲ!

    ಆದರೆ ಎಲ್ಲರೂ ಹೊಸ ವರ್ಷದ ಸಂಭ್ರಮದಲ್ಲಿರುವಾಗ ನಮ್ಮ ಬ್ಯುರೋ ಮಾತ್ರ ಗಡದ್ದಾಗಿ ನಿದ್ದೆ ಹೊಡೆದ ಪರಿಣಾಮವಾಗಿ, ಗಡಬಡನೆ ಎದ್ದು ನೋಡಿದಾಗ ಇದು 2008ರದ್ದೋ ಅಥವಾ 2009ರ ಹೊಸ ವರ್ಷವೋ ಎಂಬ ಗೊಂದಲ ನಮ್ಮ ಬ್ಯುರೋವನ್ನು ಕಾಡಿದ್ದು ಸಹಜ.

    ಎದ್ದು ನೋಡಿದಾಗ, ಏನೂ ಇರಲಿಲ್ಲ. ಅಂದರೆ ಎಲ್ಲವೂ ನಿನ್ನೆ ಯಾವ ಥರ ಇತ್ತೋ ಅದೇ ಥರ ಇದೆ. ಆದರೆ ಕೆಲವರು ರಾತ್ರಿಯಿಡೀ ಶಬ್ದ ಮಾಲಿನ್ಯ, ವಾಯು ಮಾಲಿನ್ಯದಲ್ಲಿ ನಿರತರಾಗಿ ಹೊಸ ವರ್ಷವನ್ನು ಸಂಭ್ರಮದ ಅಲೆಯಲ್ಲಿ "ತೇಲಾಡುತ್ತಾ", ಅಂದರೆ ಜಲ ಮಾಲಿನ್ಯವನ್ನೂ ಸೇರಿಸಿ, ಸ್ವಾಗತಿಸಿರುವುದು ನಗರ ಪ್ರದೇಶಗಳಾದ್ಯಂತ ಸುತ್ತಾಡಿದ ನಮ್ಮ ಏಕ ಸದಸ್ಯ ಬ್ಯುರೋದ ಎಲ್ಲಾ ಸಿಬ್ಬಂದಿಗಳಿಗೆ ಗೋಚರವಾದ ವಿಚಾರ.

    ನಮ್ಮ ಸಂಸ್ಕೃತಿಯಲ್ಲಿ ಬರುವ ಯುಗದ ಆದಿಯನ್ನು ನಾವು ಇಷ್ಟೊಂದು ಸಡಗರದಿಂದ ಬರಮಾಡಿಕೊಳ್ಳುತ್ತಿಲ್ಲವೇಕೆ, ಅದು ದೇವರ ಕೋಣೆಗೆ ಮಾತ್ರ ಸೀಮಿತವಾಗುತ್ತಿದೆಯೇಕೆ ಎಂಬ ಶಂಕೆಗಳ ಮಾಲೆಯೊಂದಿಗೆ,

    ಆದರೆ, ನಮ್ಮೆಲ್ಲಾ ಆತ್ಮೀಯರಿಗೆ ಶುಭಾಶಯ ಕೋರಲು ಒಂದು ಬಲು ದೊಡ್ಡ ಅವಕಾಶ ದೊರೆತಿದೆ, ಅದನ್ನು ಮಿಸ್ ಮಾಡಿಕೊಳ್ಳಬಾರದು. ಹಾಗಾಗಿ, ಯಾವುದರ ಆಧಾರದಲ್ಲಿ ಜಗತ್ತೇ ನಿಂತಿದೆಯೋ, ಆ ಇಂಗ್ಲಿಷ್ ಕ್ಯಾಲೆಂಡರಿನ ಹೊಸ ವರ್ಷದ ಶುಭಾಶಯಗಳನ್ನು ಬೊಗಳೆ ರಗಳೆ ಬ್ಯುರೋವು ಕೋರುತ್ತಿದೆ.

    ತಿಮಿಂಗಿಲಗಳಿಗೆ ಸಹಕಾರ: ಪ್ರಶ್ನೆ ಪತ್ರಿಕೆ, ಬೆಲೆ ಇಳಿಕೆಗಳಿಗೂ ನಿಷೇಧ

    [ಬೊಗಳೂರು ಭಾಗ್ಯಗಳ ಬ್ಯುರೋದಿಂದ] ಬೊಗಳೂರು: ಜನರು ಸೀಲಿಂಗ್ ಫ್ಯಾನಿಗೆ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದರಿಂದ ಸೀಲಿಂಗ್ ಫ್ಯಾನನ್ನೇ ನಿಷೇಧಿಸಬೇಕು...