ಬೊಗಳೆ ರಗಳೆ

header ads

ಸ್ಫೋಟ ನಡೆದಿದ್ದೆಲ್ಲಿ? ಖಂಡಿಸಲು ತಬ್ಬಿಬ್ಬಾದ ಮನೆ ಸಚಿವರು!

(ಬೊಗಳೂರು ಸ್ಫೋಟ ಖಂಡನಾ ಬ್ಯುರೋದಿಂದ)
ಬೊಗಳೂರು, ಅ.31- ದೇಶಾದ್ಯಂತ ವಿವಿಧೆಡೆ ಉಗ್ರಗಾಮಿಗಳು ನಿಜವಾದ ಬಾಂಬುಗಳನ್ನೇ ಸ್ಫೋಟಿಸುತ್ತಿರುವುದು ಮಧ್ಯದಲ್ಲಿರುವ ಮನೆ (Central Home) ಸಚಿವರ ಗಮನಕ್ಕೂ ಬಂದಿದ್ದು, ಅವರು ಕೂಡ ಶೀಘ್ರದಲ್ಲೇ ಇದನ್ನು ಖಂಡಿಸುವುದಾಗಿ ಪ್ರಕಟಿಸಿದ ತಕ್ಷಣವೇ ಬೊಗಳೆ ರಗಳೆ ಬ್ಯುರೋ ಅವರ ಬೆನ್ನು ಹತ್ತಿತು.

"ಖಂಡಿಸಿ ಖಂಡಿಸಿ... ನೀವು ಯಾವಾಗ ಖಂಡಿಸುತ್ತೀರಿ ಅಂತ ದೇಶದ ಜನರೆಲ್ಲರೂ ಶಾಂತಚಿತ್ತದಿಂದ, ಕುತೂಹಲದಿಂದ ಕಾಯುತ್ತಿದ್ದಾರೆ" ಎಂದು ಕೂಗಿಕೊಂಡ ತಕ್ಷಣವೇ, ತಮ್ಮ ಇಸ್ತ್ರಿಮಾಡಿದ ಸೂಟನ್ನು ಮತ್ತಷ್ಟು ಸರಿಪಡಿಸಿಕೊಂಡು, ತಮ್ಮೆಲ್ಲಾ ಸಾಮರ್ಥ್ಯವನ್ನು ಒಟ್ಟುಗೂಡಿಸಿಕೊಂಡು ಮನೆ ಸಚಿವರು ಖಂಡಿಸಲು ಆರಂಭಿಸಿದರು.

ಮೊದಲು ಮಾತು ಆರಂಭಿಸಿದ ಅವರು ತೊದಲುತ್ತಾ, ನಾನು ಅದನ್ನು ಖಂಡಿಸುತ್ತೇನೆ ಎನ್ನುತ್ತಾ ತಬ್ಬಿಬ್ಬಾದಂತೆ ಕಂಡು ಬಂದರು. "ಯಾವುದನ್ನು" ಎಂದು ಬೊ.ರ. ಮುಗಿಬಿದ್ದು ಕಣ್ಣು ಬಾಯಿ ಬಿಟ್ಟು ಕೇಳತೊಡಗಿದಾಗ, ಮತ್ತಷ್ಟು ತಬ್ಬಿಬ್ಬಾದ ಅವರು, "ನಿನ್ನೆ ಕೇಳಿಸಿದ್ದೇನಾದರೂ ದೀಪಾವಳಿಯ ಪಟಾಕಿಗಳ ಸದ್ದಿರಬಹುದೇ" ಎಂದು ಸಂಶಯದಿಂದಲೇ ಬೊ.ರ. ರದ್ದಿಗಾರರ ಕಿವಿಯಲ್ಲಿ ಕೇಳಿದರು.

ನಮ್ಮ ರದ್ದಿಗಾರರು ಅಪ್ಪಿ ತಪ್ಪಿ ತಲೆ ಅಲ್ಲಾಡಿಸಿದ ಬಳಿಕ, "ಇನ್ನು ಖಂಡಿಸದಿದ್ದರೆ ನನ್ನನ್ನು ಇವರು ಬಿಡುವುದಿಲ್ಲ" ಎಂಬುದನ್ನು ಅರ್ಥೈಸಿಕೊಂಡಂತೆ ಕಂಡುಬಂದರು. ನಾನು ಜೈಪುರ ಸ್ಫೋಟವನ್ನು ಖಂಡಿಸುತ್ತೇನೆ ಎಂದುಬಿಟ್ಟರು. ಪಕ್ಕದಲ್ಲೇ ಇದ್ದ ಅವರ ಪರ್ಸನಲ್ ಕಂಪ್ಯೂಟರ್... ಅಲ್ಲಲ್ಲ ಪರ್ಸನಲ್ ಸೆಕ್ರೆಟರಿ, ಸರಿಪಡಿಸುತ್ತಾ, "ಜೈಪುರ ಅಲ್ಲ ಸ್ವಾಮಿ... ಬೆಂಗಳೂರು ಬೆಂಗಳೂರು...ಸರಣಿ ಬಾಂಬ್ ಸ್ಫೋಟ" ಎಂದು ಕಿವಿಯಲ್ಲಿ ಉಸುರಿದರು.

ತಬ್ಬಿಬ್ಬಾದ ಮನೆ ಸಚಿವರು, ಒಂದಷ್ಟು ವಾಲಿದಾಗ, ಅವರ ಅಂಗ ರಕ್ಷಕ ಬಾಯಿ ಬಿಡುತ್ತಾ, "ಅಲ್ಲ ಅಲ್ಲ, ಅದು ಅಹಮದಾಬಾದ್ ಸ್ಫೋಟ" ಎಂದು ಬಿಟ್ಟ. ಬಳಿಯಲ್ಲೇ ಇದ್ದ ಮಗದೊಬ್ಬ ಅಂಗ'ಪ'ಕ್ಷಕ ಈಗ ಕೆಂಡಾಮಂಡಲವಾದ. "ಏನಾಗಿದೆ ಇವರಿಗೆ, ಸ್ಫೋಟ ನಡೆದದ್ದು ದೆಹಲಿಯಲ್ಲಿ ಅಲ್ಲವಾ" ಎಂದು ಕೇಳಿದ. ಆಗ ಬೆಳಕಿಗೆ ಬಂದ ಪರ್ಸನಲ್ ಸೆಕ್ರೆಟರಿ ನಂ.2, "ಅಲ್ಲ ಸ್ವಾಮಿ ಸ್ಫೋಟವಾಗಿದ್ದು ತ್ರಿಪುರದಲ್ಲಿ... ಅಥವಾ ನಾಸಿಕ್‌ನಲ್ಲಿಯೂ ಇರಬಹುದು ನೋಡಿ..." ಅಂತ ಮತ್ತೆ ಗೊಂದಲದ ಹಳ್ಳಕ್ಕೆ ತಳ್ಳಿದ.

ಇದನ್ನೆಲ್ಲಾ ನೋಡಿ ತಲೆ ತುರಿಸಿಕೊಂಡ ಬೊ.ರ. ವರದ್ದಿಗಾರ, "ನೀವೆಂಥಾ ಅಸಾಮಿ ಮಹಾಸ್ವಾಮಿ?"ಎಂದಾಗ, ತಕ್ಷಣವೇ ತಲೆ ಕೆರೆದುಕೊಂಡಂತೆ, ಜ್ಞಾನೋದಯವಾದವರಂತೆ, ಹುರ್ರೇ ಹುರ್ರೇ... ಯುರೇಕಾ ಎನ್ನುತ್ತಾ ತಮ್ಮ ಎರಡೂ ಕಣ್ಣುಗಳನ್ನು ಮತ್ತು ಕಿವಿಗಳನ್ನು ಸ್ವಲ್ಪವೇ ತೆರೆದ ಮನೆ ಸಚಿವರು, "ಅಸಾಮಿ ಅಲ್ಲಪ್ಪಾ, ಅಸ್ಸಾಂನಲ್ಲಿಯೇ ಸ್ಫೋಟ ಆಗಿದ್ದು, ಅದನ್ನೇ ನಾನು ಖಂಡಿಸ್ತಿರೋದು" ಎಂದು ಬಿಟ್ಟರು. ಅಲ್ಲಿಗೆ ವಿಶ್ವರೂಪದರ್ಶನ ಅಲ್ಲಲ್ಲ... ಸಂ-ದರ್ಶನ ಕಾರ್ಯಕ್ರಮವನ್ನು ಮುಕ್ತಾಯಗೊಳಿಸಲಾಯಿತು.

ಕಾಮೆಂಟ್‌‌ ಪೋಸ್ಟ್‌ ಮಾಡಿ

2 ಕಾಮೆಂಟ್‌ಗಳು

  1. ಯಾಕ್ರೀ, ನಿಮ್ಮ ಬೆಕ್ಕು ಮ್ಯಾಂವ್ or ಗುರ್ ಅಂತ ಅನ್ನೋದೇ ಇಲ್ಲಲ್ರೀ?

    ಪ್ರತ್ಯುತ್ತರಅಳಿಸಿ
  2. ಸುನಾಥರೆ,

    ನಮ್ಮ ಬೆಕ್ಕು ಮಿಯಾಂವ್ ಅಂತೇನಾದ್ರೂ ಹೇಳಿದ್ರೆ... ನೀವೆಲ್ಲಾ ಹೆದ್ರಿ ಓಡೋದ್ರೆ ಅಂತ... ತೆಪ್ಪಗಿರಲು ಹೇಳಿದ್ದೇವೆ.

    ಒಂಥರಾ ಭಯೋತ್ಪಾದನೆ ಮಟ್ಟ ಹಾಕಲು ಗಾಳಿಯಲ್ಲಿ ಗುದ್ದಾಡುತ್ತಿರುವ ಯುಪಿಎಯ ರೀತಿಯಲ್ಲಿ!

    ಪ್ರತ್ಯುತ್ತರಅಳಿಸಿ

ಏನಾದ್ರೂ ಹೇಳ್ರಪಾ :-D