Tuesday, May 19, 2009

Election FLASH: ಮಿತ್ರರಲ್ಲ, ಶತ್ರುಗಳೂ ಅಲ್ಲ

(ಬೊಗಳೂರು ಫ್ಲ್ಯಾಶ್ ನ್ಯೂಸ್ ಬ್ಯುರೋದಿಂದ)
* ದೇಶಾದ್ಯಂತ ಕಳ್ಳರ ಕಾಟ ಜಾಸ್ತಿಯಾಗಿದೆ. ಇದಕ್ಕೆ ಕಾರಣವೆಂದರೆ ಎಲ್ಲ ರಾಜಕೀಯ ಪಕ್ಷಗಳು ತಮ್ಮ ತಮ್ಮ ಹಿಂಬಾಗಿಲನ್ನು ಮುಕ್ತವಾಗಿ ತೆರೆದಿಟ್ಟಿರುವುದು.

* ಆಕ್ಸ್‌ಫರ್ಡ್ ಡಿಕ್ಷ'ನರಿ'ಯಿಂದ ಗುಳ್ಳೆ ನರಿ, ಅವಕಾಶವಾದಿ ಮುಂತಾದ ಅಮೂಲ್ಯ ಪದಗಳನ್ನು ತತ್ಕಾಲಕ್ಕೆ ತಡೆಹಿಡಿಯಲಾಗಿದೆ.

* ಡಿಕ್ಷ-ನರಿಯಿಂದ ವಿಶೇಷವಾಗಿ 'ಶತ್ರು, ವೈರಿ' ಎಂಬಿತ್ಯಾದಿ ಪದಗಳನ್ನು ಸರಕಾರ ಸ್ಥಾಪನೆಯಾಗುವವರೆಗೂ ತಡೆಹಿಡಿಯಲು ನಿರ್ಣಯ ಕೈಗೊಳ್ಳಲಾಗಿದೆ.

* 'ಕೋಮುವಾದಿ, ಜಾತ್ಯತೀತ' ಎಂಬ ವಿರುದ್ಧಾರ್ಥಕ ಪದಗಳನ್ನು ಬಳಸದಿರಲು ಮತ್ತು ಬಳಸಿದರೂ ಅದಕ್ಕೆ ತಮ್ಮದೇ ಆದ ವ್ಯಾಖ್ಯಾನವನ್ನು ಉಲ್ಲೇಖಿಸಲು ನಿರ್ಣಯ ಕೈಗೊಳ್ಳಲಾಗಿದೆ.

* ಹೆಚ್ಚು ಹೆಚ್ಚು 'ರಾಜಕೀಯದಲ್ಲಿ ಯಾರೂ ಶತ್ರುಗಳಲ್ಲ' ಎಂಬ ವಾಕ್ಯಸಮೂಹವನ್ನೇ ಬಳಸಲು ಗಂಭೀರ ಕ್ರಮ ಕೈಗೊಳ್ಳಲಾಗುತ್ತಿದ್ದು, 'ರಾಜಕೀಯದಲ್ಲಿ ಯಾರೂ ಮಿತ್ರರಲ್ಲ' ಎಂಬ ವಾಕ್ಯಸಮೂಹವನ್ನು ಸದ್ಯಕ್ಕೆ ತೆರೆಯ ಮರೆಯಲ್ಲಿ ಮತ್ತು ಮರೆಯ ತೆರೆಯಲ್ಲಿ ಇರಿಸಲು ನಿರ್ಣಯ ಸ್ವೀಕರಿಸಲಾಗಿದೆ.

* ಪಕ್ಷದ ತತ್ವಗಳು, ಪಕ್ಷದ ಸಿದ್ಧಾಂತಗಳು ಇವೆಲ್ಲವನ್ನೂ ಕಸದ ಬುಟ್ಟಿಗೆ ಹಾಕಲು ಸರ್ವಪಕ್ಷಗಳ ಸಭೆಯಲ್ಲಿ ನಿರ್ಧಾರ ಕೈಗೊಳ್ಳಲಾಗಿದ್ದು, ಅದು ತೀರಾ ಹಗುರವಾಗಿರುವುದರಿಂದ ಗಾಳಿಯಲ್ಲಿ ತೂರುವುದಕ್ಕೂ ಸಿದ್ಧತೆಗಳನ್ನು ಮಾಡಲಾಗಿದೆ.

* ಜಾತ್ಯತೀತ ವಿವಾಹಕ್ಕೆ ಹೆಚ್ಚಿನ ಒತ್ತು ನೀಡಲಾಗಿದೆ. ಶತ್ರುಗಳಾಗಿದ್ದವರನ್ನು, ಕೈಕೊಟ್ಟು ಓಡಿ ಹೋದ ಪ್ರೇಮಿಗಳನ್ನು, ಮುನಿಸಿಕೊಂಡು ವಿಚ್ಛೇದನ ನೀಡಿದವರನ್ನು ಮರಳಿ ರಾಜ ಮರ್ಯಾದೆಯಿಂದ ಕರೆತಂದು ಕ್ಷಮೆ ಯಾಚಿಸುವ ಅಥವಾ ಕ್ಷಮೆ ಕೇಳುವಂತೆ ಮಾಡುವ ಪ್ರಕ್ರಿಯೆಗೆ ಹೆಚ್ಚಿನ ಒತ್ತು ನೀಡಲಾಗಿದೆ.

* ಏನೇ ಹೇಳದಿದ್ದರೂ ನಾನು ಕ್ಷಮೆ ಯಾಚಿಸುತ್ತೇನೆ ಎಂದು ನಾಚಿಕೆ, ಮಾನ ಮತ್ತು ಮರ್ಯಾದೆಗಳೆಂಬ ರಾಜಕೀಯ ವಿರೋಧಿ-ಗುಣಗಳನ್ನು ಪಕ್ಕದ ರೀಸೈಕಲ್ ಬಿನ್‌ಗೆ ಹಾಕಲು ನಿರ್ಧರಿಸಲಾಗಿದೆ.

6 comments:

  1. Flash News is really flashig with vibrant colours.

    ReplyDelete
  2. ಸರ್,

    ನ್ಯೂಸ್ ನಿಜಕ್ಕೂ ಬಣ್ಣಮಯವಾಗಿಯೇ ಇದೆ...ಖುಷಿಯಾಯಿತು..

    ReplyDelete
  3. ಇದು ಹೈಬ್ರಿಡ್ ರಾಜಕೀಯ!

    ReplyDelete
  4. ಜಯಲಕ್ಷ್ಮಿ ಅವರೆ, ಬೊಗಳೂರಿಗೆ ಆದರದ ಸ್ವಾಗತ.
    ಈ ವ-ರದ್ದಿಗಳು ನಮ್ಮ ಮಂಡೆಗೆ ಫ್ಲ್ಯಾಶ್ ಆಗದಿದ್ದರೂ, ನಿಮ್ಮ ಕಣ್ಣು ಕುಕ್ಕುವಷ್ಟರ ಮಟ್ಟಿಗೆ ಫ್ಲ್ಯಾಶ್ ಆಗಿದೆ ಅಂತ ಕೇಳಿ ಭಯಾತಂಕವಾಯ್ತು. ಕಡ್ಡಾಯವಾಗಿ ಕ್ಷಮ್ಸಿ ಅಂತ ಬೊಗಳೂರು ಮಂದಿ ಕೇಳಿಕೊಳ್ತಾ ಇದ್ದಾರೆ.

    ReplyDelete
  5. ಶಿವು ಅವರೆ,
    ನೀವಿಲ್ಲಿ ಬಣ್ಣಾ ಬಣ್ಣಾ ಒಲವಿನ ಬಣ್ಣ ಅಂತ ಪಿಚಕಾರಿ ಹಿಡಿದುಕೊಂಡು ಓಕುಳಿಯಾಟಕ್ಕೆ ಹೊರಟಿರುವುದು ನಮಗೂ ಸಂತೋಷವಾಗಿಬಿಟ್ಟಿದೆ.

    ReplyDelete
  6. ಸುನಾಥರೆ,
    ಈ ಬಗೆಯ ರಾಜಕೀಯ ತಳಿಗಳ ನಿರ್ನಾಮಕ್ಕೆ ಮತದಾರರು ಈ ಬಾರಿ ಒಂದಷ್ಟು ಯೋಚಿಸಿ ಯೋಚಿಸಿ ಯೋಚಿಸಿ ತೀರ್ಮಾನ ತೆಗೆದುಕೊಳ್ಳಲು ನಿರ್ಧರಿಸಿದ್ದರಿಂದಾಗಿಯೇ ಪ್ರಾದೇಶಿಕ ಪಕ್ಷಗಳಿಗೆ ಅಲ್ಲಲ್ಲಿ ಒಂದಷ್ಟು ಆಘಾತವಾಗಿದೆ. ಈ ಹೈಬ್ರಿಡ್ ಕಳೆಗಳನ್ನು ಕೀಳಬೇಕಾಗಿದೆ.

    ReplyDelete

ನಿಮ್ಮ ಸಲಹೆ/ಅಭಿಪ್ರಾಯ ತಿಳಿಸಿ..

ತಿಮಿಂಗಿಲಗಳಿಗೆ ಸಹಕಾರ: ಪ್ರಶ್ನೆ ಪತ್ರಿಕೆ, ಬೆಲೆ ಇಳಿಕೆಗಳಿಗೂ ನಿಷೇಧ

[ಬೊಗಳೂರು ಭಾಗ್ಯಗಳ ಬ್ಯುರೋದಿಂದ] ಬೊಗಳೂರು: ಜನರು ಸೀಲಿಂಗ್ ಫ್ಯಾನಿಗೆ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದರಿಂದ ಸೀಲಿಂಗ್ ಫ್ಯಾನನ್ನೇ ನಿಷೇಧಿಸಬೇಕು...