Monday, September 15, 2014

ಬೊಗಳೆ ಹುಟ್ಟು ಹಬ್ಬಕ್ಕೆ ಕಡಿವಾಣ: ಮೋದಿ

[ಬೊಗಳೂರು ಹುಹ ಬ್ಯುರೋದಿಂದ]
ಬೊಗಳೂರು, ಸೆ.15- ಬೊಗಳೂರು ಬ್ಯುರೋದ ಏಕೈಕ ಓದುಗರೂ ಆಗಿರುವ ಸಂಸ್ಥಾಪಕ ಅಸತ್ಯದ ಅನ್ವೇಷಿ ಹುಟ್ಟು ಹಬ್ಬವನ್ನು ಇಡೀ ಭಾರತದಲ್ಲಿ ಹಿಂದೀ ದಿವಸವಾಗಿ ಆಚರಿಸುತ್ತಾ ಮತ್ತು ಪ್ರತಿಭಟನೆಯನ್ನೂ ಮಾಡುತ್ತಿರುವುದರಿಂದ ಎಚ್ಚೆತ್ತ ಕೇಂದ್ರ ಸರಕಾರವು ಈ ಬಗ್ಗೆ ಕಠಿಣ ಕ್ರಮ ಕೈಗೊಳ್ಳಲು ನಿರ್ಧರಿಸಿದೆ ಎಂದು ಮೂಲಗಳು ವರದ್ದಿ ತಂದು ಸುರಿದಿವೆ.

ತಾಜಾ ಸುದ್ದಿಯ ಪ್ರಕಾರ, ಏಕ ಸದಸ್ಯ ಬೊಗಳೂರು ಬ್ಯುರೋದ ಸಮಸ್ತ ಸದಸ್ಯರ ಹುಟ್ಟುಹಬ್ಬವನ್ನು ಎಲ್ಲರೂ ಪರಿಪರಿಯಾಗಿ ಆಚರಿಸುತ್ತಿರುವುದರಿಂದ, ನಮ್ಮ ಜನ-ಅಪ್ರಿಯತೆಯನ್ನು ಮನಗಂಡ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರೇ ಈ ಕುರಿತು ನೇರವಾಗಿ ಹೇಳಿಕೆ ನೀಡಿದ್ದಾರೆ.

ಇದೆಂದರೆ, ಹುಟ್ಟು ಹಬ್ಬವನ್ನು ಯಾರು ಕೂಡ ಭರ್ಜರಿಯಾಗಿ ಆಚರಿಸಿಕೊಳ್ಳಬಾರದು ಎಂದು, ಜನಪ್ರಿಯತೆಯಲ್ಲಿ ಕೆಳಗಿನಿಂದ ನಮ್ಮಿಂದ ಸಾವಿರದ ಒಂಬೈನೂರನೇ ಸ್ಥಾನದಷ್ಟು ದೂರದಲ್ಲಿರುವ ಪ್ರತಿಸ್ಫರ್ಧಿ ಪತ್ರಿಕೆ ಇಲ್ಲಿ ವರದಿ ಮಾಡಿದೆ.

ಇದೇ ವೇಳೆ, ಹುಟ್ಟುಹಬ್ಬಕ್ಕೆ ಶುಭಾಶಯ ಕೋರಿದವರಿಗೆ, ಶುಭಾಶಯಕ್ಕಾಗಿಯೇ ನಮ್ಮ ಬ್ಯುರೋದವರನ್ನು ನಿದ್ದೆಯಿಂದ ಬಡಿದೆಬ್ಬಿಸಲು ಪ್ರಯತ್ನಿಸಿದವರಿಗೆ ಪ್ರತಿ-ಶುಭಾಶಯಗಳನ್ನೂ ಈ ಮೂಲಕ ಕೋರಲಾಗಿದೆ. ದಯವಿಟ್ಟು ನರೇಂದ್ರ ಮೋದಿ ಅವರಿಗೆ ವಿಷಯ ತಿಳಿಸಬಾರದಾಗಿ ಮತ್ತೊಂದು ವಿನಂತಿ.

Tuesday, May 06, 2014

ಬೊಗಳೆ ಬ್ರೇಕ್: ಸೌದಿ ಮಹಿಳೆಯರ ವಿರುದ್ಧ ಕತ್ತೆಗಳ ಪ್ರತಿಭಟನೆ

[ಬೊಗಳೂರು ಪ್ರಾಣಿಗಳ ಬ್ಯುರೋದಿಂದ]
ಬೊಗಳೂರು, ಮೇ 06- ಗಂಡಂದಿರು ಹೆಂಡಂದಿರ ವಿರುದ್ಧ ತಮ್ಮ ಹೆಸರು ದುರುಪಯೋಗಪಡಿಸುತ್ತಿರುವುದಕ್ಕಾಗಿ ಕತ್ತೆಗಳು ಮತ್ತು ಹಸುಗಳು ಕೋರ್ಟ್ ಮೆಟ್ಟಿಲೇರಿದ್ದು, ಪ್ರಾಣಿ ನಿರ್ದಯ ಸಂಘ ನೇತೃತ್ವದಲ್ಲಿ ಪ್ರತಿಭಟನೆಗಿಳಿದಿವೆ.

ಇದಕ್ಕೆ ಕಾರಣ, ಸೌದಿ ಅರೇಬಿಯದಲ್ಲಿ ಒಬ್ಬನೇ ಗಂಡ, ತನ್ನ ಒಬ್ಬಳೇ ಹೆಂಡತಿಯನ್ನು ಬಹಿರಂಗವಾಗಿ, ಸಾರ್ವಜನಿಕವಾಗಿ, ಸಾರಾಸಗಟಾಗಿ ಮತ್ತು ಧೈರ್ಯ ಹಾಗೂ ವೀರಾವೇಶದಿಂದ 'ಏಯ್ ದನಾ, ಏಯ್ ಕತ್ತೆ' ಅಂತ ಕರೆದು ನ್ಯಾಯಾಲಯದ ಮೆಟ್ಟಿಲು ಹತ್ತಬೇಕಾದ ಪ್ರಸಂಗ. ಅದು ಇಲ್ಲಿ ವರದ್ದಿಯಾಗಿದೆ. 

ಹೆಂಡತಿಯರನ್ನು ಇನ್ಸಲ್ಟ್ ಮಾಡಲು ನಮ್ಮ ಹೆಸರು ದುರುಪಯೋಗಪಡಿಸಲಾಗಿದೆ. ನಾವೇನು ಅಷ್ಟು ಕೀಳು ಪ್ರಾಣಿಗಳೇ ಎಂದು ಪ್ರಾಣಿ ನಿರ್ದಯ ಸಂಘವು ಅಧಿಕಾರಿಗಳಿಗೆ ಸಲ್ಲಿಸಿದ ಅರ್ಜಿಯಲ್ಲಿ ಅಲವತ್ತುಕೊಂಡಿದೆ.

"ನಮ್ಮ ಹೆಸರನ್ನೇ ಇನ್ಸಲ್ಟ್ ಎಂದು ಕರೆದ ಪತ್ನಿಯರನ್ನು ಬಂಧಿಸಬೇಕು" ಎಂದು ಒತ್ತಾಯಿಸಿರುವ ಸಂಘದ ಅಧ್ಯಕ್ಷ ಪ್ರಾಣಿ ಕುಮಾರ್ ಅವರು, ಅಷ್ಟು ಸಾಧುವಾದ ಪ್ರಾಣಿಗಳನ್ನು ಅಸಹ್ಯ ಮತ್ತು ಕೀಳು ಎಂದು ಪರಿಗಣಿಸಿರುವವರ ಮೇಲೆ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ.

ನೀವೇನು ನಮ್ಮಂತೆ ದುಡಿಯುವುದಿಲ್ಲವೇ ಎಂದು ಸಂಘದ ಮಹಾ ಕೋಶಾಧಿಕಾರಿ ಗಾರ್ದಭ ಕುಮಾರ್ ಮಹಿಳೆಯರಿಗೆ ನಾಟುವ ರೀತಿಯಲ್ಲಿ ಪ್ರಶ್ನಿಸಿದ್ದಾರೆ. ಮುಂದಿನ ವಿಚಾರಣೆಯ ಕುರಿತು ಅಸತ್ಯಾನ್ವೇಷಣೆ ನಡೆಯುತ್ತಿದೆ.

Tuesday, April 29, 2014

ಬೊಗಳೆ ಬ್ರೇಕ್: ನಿಧಾನಸೌಧದಲ್ಲಿ ಗೂಬೆಗಳು: ಗೂಬೆಗಳಿಗೇ ಅಚ್ಚರಿ!

[ಬೊಗಳೂರು ಗೂಬೆಗಳ ಬ್ಯುರೋದಿಂದ]
ಬೊಗಳೂರು, ಏ.29- ಗೂಬೆಗಳೂ ನಿಧಾನಸೌಧಕ್ಕೆ ಹೋಗಿದ್ದೇಕೆ ಮತ್ತು ಅದನ್ನು ಓಡಿಸಲು ಯಾರೆಲ್ಲಾ ಶತಪ್ರಯತ್ನ ಪಟ್ಟರು ಎಂಬ ಅಂಶವನ್ನು ಬೊಗಳೆ ರಗಳೆ ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿಗಳು ಭಾರೀ ತ್ರಾಸ ಪಟ್ಟು ಪತ್ತೆ ಹಚ್ಚಿ ಬಿಟ್ಟಿದ್ದಾರೆ.

ಗೂಬೆಗಳು ನಿಧಾನಸೌಧಕ್ಕೇ ಯಾಕೆ ಪ್ರವೇಶಿಸಿದ್ದು ಎಂಬುದು ತನಿಖೆಯಾಗಬೇಕಿರುವ ಸಂದರ್ಭದಲ್ಲಿಯೇ, ಗೂಬೆಯನ್ನು ಓಡಿಸಿದವರಾರು ಎಂಬ ಪ್ರಶ್ನೆಯೂ ಕೋಲಾಹಲಕಾರಿಯಾಗಿ ಕಾಡುತ್ತಿತ್ತು. ಈ ಹಿನ್ನೆಲೆಯಲ್ಲಿ ತನಿಖೆ ನಡೆಸಿದಾಗ ಸಿಕ್ಕಿಬಿದ್ದದ್ದು ರಣ ಹದ್ದುಗಳು!

ರಣ ಹದ್ದುಗಳು ಈಗಾಗಲೇ ನಿಧಾನಸೌಧದೊಳಗೆ ನೆಲೆಯಾಗಿವೆ ಎಂಬ ಬಾಯ್ಮಾತು ಕೇಳಿಬರುತ್ತಿದ್ದರೂ ಇದರಲ್ಲಿನ ಅಸತ್ಯಾಂಶವೇನೆಂಬುದು ಜನರಿಗಿನ್ನೂ ತಿಳಿದಿರಲಿಲ್ಲ. ಈ ಹಿನ್ನೆಲೆಯಲ್ಲಿ, ಇದ್ದ ಅಲ್ಪಬುದ್ಧಿಯನ್ನು ಓಡಿಸಿದಾಗ ದೊರೆತ ಅಂಶವೆಂದರೆ, ರಣ ಹದ್ದುಗಳು ಇತ್ತೀಚೆಗೆ ಜನರ ರಕ್ತ ಹೀರುತ್ತಿರುವುದು ಹೆಚ್ಚಾಗಿಬಿಟ್ಟಿವೆ. ಜನ ಸಾಮಾನ್ಯರು ಬೆವರು ಸುರಿಸಿ ದುಡಿದ ಹಣವನ್ನು ಲಂಚದ ರೂಪದಲ್ಲಿ ಪ್ರಾಣಿ ಸಂಗ್ರಹಾಲಯದಲ್ಲಿ ಸಾಕಲು ಅಯೋಗ್ಯವಾದ ಮತ್ತು ಜನರ ಮನೆಗಳಲ್ಲೇ ಸಾಕು ಪ್ರಾಣಿಗಳ ರೂಪದಲ್ಲಿ (ಹೆಸರು ಹೇಳುವುದಿಲ್ಲ ಬಿಡಿ) ನೆಲೆಯಾಗಿರುವ ಪ್ರಾಣಿಗಳು ಪ್ರತಿಯೊಂದು ಹೆಜ್ಜೆಗೂ ಸುಲಿಗೆ ಮಾಡುತ್ತಿರುತ್ತವೆ. ಈ ರೀತಿ ಸುಲಿಗೆ ಮಾಡಿದ ಆಹಾರದಲ್ಲಿ, ಅವರ ಒಡೆಯರಿಗೂ ಕೋಟ್ಯಂತರ ರೂಪದಲ್ಲಿ ಸಂದಾಯ ಮಾಡಬೇಕಾಗುತ್ತದೆ. ಈ ಒಡೆಯರೆಂದರೆ ರಣ ಹದ್ದುಗಳು.

ಈ ರಣ ಹದ್ದುಗಳೇ ಗೂಬೆಗಳನ್ನು ಓಡಿಸಿದ್ದು. ಯಾಕೆಂದರೆ, ತಮಗೆ ದೊರೆಯುವ ಮೊತ್ತದಲ್ಲಿ ಗೂಬೆಗಳೂ ಪಾಲು ಹೀರಿಕೊಂಡರೆ, ತಮಗೆ, ತಮ್ಮ ಮಕ್ಕಳಿಗೆ, ಮೊಮ್ಮಕ್ಕಳಿಗೆ, ಮರಿ ಮೊಮ್ಮಕ್ಕಳಿಗಾಗುವಷ್ಟು ಆಸ್ತಿಪಾಸ್ತಿ ಮಾಡಿಕೊಳ್ಳುವುದಾದರೂ ಹೇಗೆ ಎಂಬ ದುರಾಲೋಚನೆಯೇ ಗೂಬೆ ಓಡಿಸಲು ಪ್ರಮುಖ ಕಾರಣ ಎಂಬುದನ್ನು ಪತ್ತೆ ಹಚ್ಚಲಾಗಿದೆ.

ಆದರೆ ಗೂಬೆಗಳು ಬಂದಿದ್ದೇಕೆ? ಎಂಬ ಪ್ರಶ್ನೆಯೂ ಪ್ರಸ್ತುತವಾಗುತ್ತಿರುವುದರಿಂದ ಮತ್ತಷ್ಟು ಕೆದಕಲಾಯಿತು. ರಾತ್ರಿಯೆಲ್ಲ ಬಾಡೂಟ, ಆ ಪಾರ್ಟಿ ಈ ಪಾರ್ಟಿಯಲ್ಲಿ ಸುಸ್ತಾದವರು ಹಗಲು ರೆಸ್ಟ್ ತೆಗೆದುಕೊಳ್ಳಲೆಂದು ಈ ನಿಧಾನಸೌಧಕ್ಕೆ ಬಂದು, ತೂಕಡಿಸುತ್ತಾ ಇರುತ್ತಾರೆ. ಇಂತಹಾ ತಮ್ಮದೇ ಜೀವನ ಶೈಲಿಯನ್ನು (ಹಗಲು ನಿದ್ದೆ, ರಾತ್ರಿ ಕೆಲಸ) ಅನುಸರಿಸುತ್ತಿರುವವರು ಹೇಗಿದ್ದಾರೆ, ತಮ್ಮ ಗೆಳೆಯರು ಹೇಗಿದ್ದಾರೆ ಎಂದೆಲ್ಲಾ ತಿಳಿದುಕೊಳ್ಳಲೆಂದೇ ಅವುಗಳು ಬಂದಿರಬಹುದು ಎಂದು ಶಂಕಿಸಲಾಗಿದೆ.

Thursday, April 24, 2014

ಬೊಗಳೆ ಬ್ರೇಕ್: ಚುನಾವಣೆಗಾಗಿ ಕ್ರೋಸಿನ್ ಮಾತ್ರೆ ದರ ಕಡಿತ!

[ಬೊಗಳೂರು ತಲೆನೋವು ಬ್ಯುರೋದಿಂದ]
ಬೊಗಳೂರು, ಏ.24- ಕ್ರೋಸಿನ್ ಎಂಬ ವಿಶೇಷವಾಗಿ ತಲೆ ಹಾಗೂ ಮತ್ತೇನೇನೋ ನೋವಿನ ಶಮನಕ್ಕೆ ಬಳಸಲಾಗುವ ಮಾತ್ರೆಗಳಿಗೆ ಇತ್ತೀಚೆಗೆ ಬೇಡಿಕೆ ಹೆಚ್ಚಾಗಿದ್ದರೂ, ಬೆಲೆ ತಗ್ಗಿಸಿರುವುದರ ಹಿಂದಿನ ರಹಸ್ಯ ಬಯಲಾಗಿದೆ.

ಇತ್ತೀಚಿನ ದಿನಗಳಲ್ಲಂತೂ ವಿಶೇಷವಾಗಿ ಚುನಾವಣಾ ಕಾಲದಲ್ಲಿ ಜನರು ಸಾಕಷ್ಟು ನೋವುಗಳಿಂದ ಬಳಲುತ್ತಿದ್ದಾರೆ. ಶೇ.99.99 ಮಂದಿ ಕೂಡ ಈ ಭೀಷಣ ಭಾಷಣಗಳ ಅರಚಾಟದಿಂದಾಗಿ ತಲೆ ನೋವು ಅನುಭವಿಸುತ್ತಿದ್ದರೆ, ಮತ್ತೆ ಕೆಲವರು ಚಪ್ಪಲಿ, ಮೊಟ್ಟೆ, ಕಲ್ಲು ಮಾತ್ರವಲ್ಲದೆ 'ಕೈ'ಯೇಟಿನಿಂದ ನೋವು ಎದುರಿಸತೊಡಗಿದ್ದಾರೆ.

ಈ ಕಾರಣದಿಂದಾಗಿ ಕ್ರೋಸಿನ್ ಮಾತ್ರೆಗಳ ಬೇಡಿಕೆ ರಾಕೆಟ್ ವೇಗದಲ್ಲಿ ಮೇಲೇರುತ್ತಿದ್ದರೂ, ಗ್ಲ್ಯಾಕ್ಸೋ ಕಂಪನಿಯು ದರವನ್ನು ದಿಢೀರ್ ಇಳಿಸಿದೆ ಎಂದು ನಮಗೆ ಪ್ರಬಲವಾಗಿ ಪ್ರತಿಸ್ಫರ್ಧೆ ನೀಡಲು ಇನ್ನಿಲ್ಲದ ಪ್ರಯತ್ನ ಮಾಡುತ್ತಿರುವ ಪತ್ರಿಕೆಯೊಂದು ಇಲ್ಲಿ ವರದ್ದಿ ಪ್ರಕಟಿಸಿದೆ.

ಈಗಾಗಲೇ ಅಗತ್ಯ ವಸ್ತುಗಳ ಬೆಲೆ ಏರಿಕೆಯಿಂದ ಕಂಗೆಟ್ಟಿರುವ ಮತದಾರರು ತಲೆನೋವು ಹೆಚ್ಚಾಗಿ ತಮ್ಮ ವಿರೋಧಿಗಳಿಗೆ ಮತ ಹಾಕಬಾರದೆಂಬ ಉದ್ದೇಶದಿಂದ ಆಡಳಿತಾರೂಢ ಸರಕಾರವು ಕ್ರೋಸಿನ್ ಮಾತ್ರೆಗಳನ್ನಾದರೂ ಜನರಿಗೆ ಸುಲಭವಾಗಿ ಲಭ್ಯವಾಗುವಂತೆ ಮಾಡಿ ಎಂದು ಮಾತ್ರೆ ಕಂಪನಿಯ ಮೇಲೆ ಒತ್ತಡ ಹೇರಿತ್ತು ಎಂಬ ಅಸತ್ಯಾಂಶವೊಂದನ್ನು ಅನ್ವೇಷಣೆ ಮಾಡಲಾಗಿದೆ. ಕನಿಷ್ಠ ಪಕ್ಷ, ಅಕ್ಕಿ ಬೇಳೆ ತಿನ್ನದಿದ್ದರೂ, ಕಡಿಮೆ ದರದಲ್ಲಿ ದೊರೆಯುವ ಮಾತ್ರೆಗಳನ್ನಾದರೂ ತಿಂದು ಜನರು ಹೊಟ್ಟೆ ತುಂಬಿಸಿಕೊಳ್ಳಲಿ. ಅವರ ತಲೆನೋವು ಕಡಿಮೆಯಾಗಿ ತಲೆಕೆಟ್ಟು ಮತ ಹಾಕಲಿ ಎಂದು ಮಾನ್ಯ ನಿಧಾನಮಂತ್ರಿಗಳು ಘೋಷಿಸಿರುವುದಾಗಿ ಮೂಲಗಳು ತಿಳಿಸಿವೆ.

Wednesday, April 09, 2014

ಬೊಗಳೆ ಅನ್ವೇಷಣೆ: ಕ್ರೇಜಿವಾಲ್‌ರದ್ದು ಏಟಿಗಾಗಿ ನೋಟು?

[ಬೊಗಳೆ ಅಸತ್ಯಾನ್ವೇಷಣೆ ಬ್ಯುರೋದಿಂದ]
ಬೊಗಳೂರು, ಏ.9- ಹಸಿ ನಾತಪುರದ ಮಾಜಿ 'ಪ್ರಧಾನ' ಮಂತ್ರಿ ರಾರಾವಿಂದ ಕ್ರೇಜಿವಾಲ್‌ಗೆ ಆಟೋ ಚಾಲಕನೊಬ್ಬ ತಪರಾಕಿ ನೀಡಿದ್ದು ಯಾಕೆ ಮತ್ತು ಅದು ಕೂಡ ಕೆನ್ನೆ ಕೆಂಪಗಾಗಿ ಒಂದು ಕಣ್ಣು ಕೆಂಪನೆ ಊದಿಕೊಳ್ಳುವಷ್ಟು ಬಲವಾಗಿ ಹೊಡೆದಿದ್ದು ಯಾಕೆ ಎಂಬ ಅಂಶವನ್ನು ಬೊಗಳೆ ರಗಳೆಯ ಅಸತ್ಯಾನ್ವೇಷಣಾ ಬ್ಯುರೋ ಪತ್ತೆ ಹಚ್ಚಿದೆ.

ತಮಗೆ ಹೊಡೆದ ಆಟೋ ಚಾಲಕನ ಮನೆಗೆ ಕ್ರೇಜಿವಾಲ್ ಭೇಟಿ ನೀಡಿ ಸಾಂತ್ವನ ಹೇಳಿದಾಗಲೇ ಮತ್ತು ಹೇಳಿಸಿಕೊಂಡಾಗಲೇ ಈ ಅಂಶ ಅಲ್ಲೇ ಮೂಲೆಯಲ್ಲಿ ವೀಕ್ಷಿಸುತ್ತಿದ್ದ ನಮ್ಮ ಏಕಸದಸ್ಯ ಬ್ಯುರೋದ ಎಲ್ಲ ಸದಸ್ಯರಿಗೂ ತಿಳಿದಿದೆ. ಕ್ರೇಜಿವಾಲ್ "ಸುಳ್ಳುಗಾರ" ಎನ್ನುತ್ತಾ ರೋಷಾವೇಷದಿಂದ ಹೊಡೆದರೂ ಮಾಜಿ ಸಿಎಂ ತಮ್ಮ ಮನೆಗೆ ಬಂದಾಗ ಅವರನ್ನೇ ದೇವರು, ದಿಂಡರು ಅಂತೆಲ್ಲಾ ಈ ಆಟೋ ಚಾಲಕ ಮತ್ತು ಆಮ್ ಆದ್ಮೀ ಪಕ್ಷದ ಬೆಂಬಲಿಗ ಕೊಂಡಾಡಿರುವ ಹಿನ್ನೆಲೆಯೂ ಬಯಲಾಗಿದೆ.

ಈ ಕುರಿತು ಬೊ.ರ. ಬ್ಯುರೋಗೆ ಮಾತ್ರ ಊದಿನ ಕೆನ್ನೆ, ಕೆಂಪು ಕಣ್ಣಿನೊಂದಿಗೆ ಸಮ್-ದರ್ಶನ ನೀಡಲು ಒಪ್ಪಿ ಮಾತನಾಡಿದ ಕ್ರೇಜಿವಾಲ್, ಚುನಾವಣಾ ಭರಾಟೆ ಜೋರಾಗಿರುವುದರಿಂದ, ಒಂದಿಷ್ಟು ಪ್ರಚಾರ ಬರಲಿ, ಟಿವಿ ಚಾನೆಲ್‌ಗಳ ಟಿಆರ್‌ಪಿ ಹೆಚ್ಚಾಗಲಿ ಎಂಬ ಕಾರಣಕ್ಕೆ ತಾನು ಈ ಕಪಾಳ ಮೋಕ್ಷದ ನಾಟಕ ಏರ್ಪಡಿಸಿದ್ದೆ ಎಂಬುದನ್ನು ಒಪ್ಪಿಕೊಂಡಿದ್ದಾರೆ. ಆತನನ್ನು ಕ್ಷಮಿಸುತ್ತೇನೆ ಮತ್ತು ಕೇಸು ದಾಖಲಿಸುವುದಿಲ್ಲ ಎಂದೆಲ್ಲಾ ಭರವಸೆ ನೀಡಿದ್ದೆ. ಆದರೆ, ಏಟಿನ ಮೊದಲು ನೋಟು ಸಿಗಬೇಕು ಎಂಬುದು ಆತನ ಆಗ್ರಹವಾಗಿತ್ತು. ಮೊದಲು ಏಟು, ಆ ಮೇಲೆ ನೋಟು ಅಂತ ನಾನು ಹೇಳಿದ್ದೆ. ಮೊದಲ ಮಾತುಕತೆಯ ವೇಳೆ ನೋಟು ಕೊಟ್ಟರೆ ಮಾತ್ರ ಏಟು ಅಂತ ನಿರ್ಧಾರವಾಗಿತ್ತು. ಈಗ ಈತ ಸುಳ್ಳಾಡುತ್ತಿದ್ದಾರೆ ಎಂಬುದು ಆಟೋ ಚಾಲಕನ ವಾದ. ಹೀಗಾಗಿ, ನಿಗದಿತ ದಿನದಂದು ತನ್ನಲ್ಲಿದ್ದ ಎಲ್ಲ ಶಕ್ತಿಯನ್ನೂ ಕೈಗೂಡಿಸಿಕೊಂಡು, ಬಾರಿಸಿದ್ದಾನೆ. ನಾನು ಗಾಂಧಿ ಸಮಾಧಿ ಬಳಿ ಹೋಗಿ 'ಹೇ ರಾಮ್' ಎನ್ನುತ್ತಾ ಸ್ವಲ್ಪ ಕಾಲ ಧ್ಯಾನ ಮಾಡಿ ಸುಧಾರಿಸಿಕೊಳ್ಳಬೇಕಾಯಿತು ಎಂದು ವಿವರಿಸಿದ್ದಾರೆ.

ಈಗ ಲೆಕ್ಕ ಎಲ್ಲ ಚುಕ್ತಾ ಆಗಿದೆ. ಹೀಗಾಗಿ ರಾರಾವಿಂದರೇ ನಮ್ಮ ದೇವರು ಅಂತ ಆಟೋ ಚಾಲಕನೂ ಸ್ಪಷ್ಟನೆ ನೀಡಿದ್ದಾನೆ.

Friday, April 04, 2014

ಚಿಕ್ಕಬಳ್ಳಾಪುರದಲ್ಲಿ ನೇತ್ರಾವತಿಗೆ ಮೊದಲು ಕುಮಾರ ಧಾರೆ!

[ಬೊಗಳೂರು ಕಣ್ಣೀರ ಧಾರೆ ಬ್ಯುರೋದಿಂದ]
ಬೊಗಳೂರು, ಏ.4- ಓಟು ಬಂದಿದೆ ಎಂದು ತಿಳಿದದ್ದೇ ತಡ, ತಡವಾಗಿಯಾದರೂ ಎಚ್ಚೆತ್ತುಕೊಂಡಾಗ ಬಹುತೇಕ ಮುಕ್ತಾಯದ ಹಂತದಲ್ಲಿದೆ ಎಂಬುದು ಬೊಗಳೆ ರಗಳೆ ಬ್ಯುರೋ ಅರಿವಿಗೆ ಬಂದಿರುವಂತೆಯೇ, ತಟ್ಟನೇ ಎಬ್ಬಿಸಿ ವರದ್ದಿಗಾರರನ್ನು ಅಟ್ಟಿದಾಗ ಸಿಕ್ಕಿದ ವರದ್ದಿ ಇದು.

ಚಿಕ್ಕಬಳ್ಳಾಪುರದಲ್ಲಿ ನಡೆಯುತ್ತಿರುವ ಆವಾಂತರಗಳ ಕುರಿತು ಗಮನ ಸೆಳೆಯಲು ಹಾಗೂ ಬೆಳಕು ಚೆಲ್ಲಲು ಹೋಗುವಾಗ, ಪೂರ್ವಸಿದ್ಧತೆಯಿಲ್ಲದೆಯೇ ಹೋದ ಕಾರಣ ನಮ್ಮ ವರದ್ದಿಗಾರರು ಮುಳುಗೇಳಬೇಕಾಗಿಬಂದಿತ್ತು. ಇದಕ್ಕೆ ಕಾರಣ, ಅಲ್ಲಿ ಹೋದಲ್ಲೆಲ್ಲಾ ನೀರು.

ನೇತ್ರಾವತಿಯ ಉಪನದಿಯಾಗಿರುವ ಎತ್ತಿನಹೊಳೆ ನದಿಯನ್ನು ತಿರುಗಿಸಿ, ಜನರಿಗೆ ನೀರು ಕುಡಿಸುತ್ತೇವೆ ಎಂದು ದಕ್ಷಿಣ ಕನ್ನಡದ ಮಣ್ಣಿನ ಸುಪುತ್ರ ವೀರಪ್ಪ ಮೊಯ್ಲಿ ರಪ್ಪರಪ್ಪನೇ ಹೇಳಿದಾಗಲೇ ಜನರು ಅಲ್ಲಿ ಆನಂದತುಂದಿಲರಾಗಿದ್ದರು. ಈ ಬಾರಿ ಆ ಎತ್ತಿನ ಹೊಳೆಯ ನೀರಿನಲ್ಲಿ ವೋಟುಗಳೆಲ್ಲವೂ ನಮ್ಮ ಗಾಳಕ್ಕೇ ಬೀಳುತ್ತವೆ ಎಂಬುದು ಕಾಂಗ್ರೆಸ್ ಲೆಕ್ಕಾಚಾರವಾಗಿದೆ ಎಂದು ನಮ್ಮ ಅನಧಿಕೃತ ಮೂಲಗಳು ತಿಳಿಸಿವೆ.

ಆದರೆ, ಅತ್ತ ಕಡೆ ಇದೇ ಕೈಪಕ್ಷದ ಮುಖಂಡರು ಚಿಕ್ಕಬಳ್ಳಾಪುರ-ಎತ್ತಿನಹೊಳೆ-ಮೊಯ್ಲಿ ಮುಂತಾದ ಶಬ್ದಗಳಿಗೆ ನಿಷೇಧ ಹೇರಿದ್ದಾರೆ. ನೇತ್ರಾವತಿಯನ್ನು ಅತ್ತಕಡೆ ಕರೆದುಕೊಂಡು ಹೋಗುವುದಾಗಿಯೂ, ಆ ನೀರು ನೋಡಿಯೇ ಸಾಯುವುದಾಗಿಯೂ ಮೊಯ್ಲಿ ಘೋಷಿಸಿರುವುದು ಇಲ್ಲಿನ ಕಾಂಗ್ರೆಸ್ ಅಭ್ಯರ್ಥಿ ಜನಾರ್ದನ ಪೂಜಾರಿಗೆ ನುಂಗಲಾರದ ಬಿಸಿತುಪ್ಪ ಎಂದು ವಾರ್ತೆಗಳು ತಿಳಿಸಿವೆ. ನಮ್ಮ ದಕ್ಷಿಣ ಕನ್ನಡದ ಜೀವಸೆಲೆಯನ್ನು ಕರೆದುಕೊಂಡು ಹೋಗಿ, ತಮ್ಮ ಮತಗಳ ಬುಟ್ಟಿ ತುಂಬಿಸಿಕೊಂಡು ರಾಜಕೀಯ ಜೀವನವನ್ನು ಸುಧಾರಿಸಿಕೊಳ್ಳಲು ಇವರಿಗೆ ಬಿಟ್ಟವರಾರು ಎಂಬುದು ದ.ಕ.ದವರ ಅಬ್ಬರ.

ಇಷ್ಟೆಲ್ಲಾ ನೇತ್ರಾವತಿ ಕಿತಾಪತಿ ನಡುವೆಯೇ, ನೇತ್ರಾವತಿಗೂ ಮೊದಲೇ ಕುಮಾರಧಾರೆಯನ್ನು ಚಿಕ್ಕಬಳ್ಳಾಪುರಕ್ಕೆ ಹರಿಸಿಯೇ ಸಿದ್ಧ ಎಂದು ಘಂಟಾಘೋಷವಾಗಿ ಸಾರಿರುವ ಮಾಜಿ ಪ್ರಧಾನಿಯ ಕುಮಾರ, ಗಳಗಳನೆ ಕಣ್ಣೀರಿಡುವ ಕೈಂಕರ್ಯಕ್ಕೆ ಚಾಲನೆ ನೀಡಿದ್ದಾರೆ. ಚಿಕ್ಕಬಳ್ಳಾಪುರದಲ್ಲಿ ಸ್ಫರ್ಧಿಸದಿದ್ದರೆ ನೀನು ನನ್ನ ಮಗನೇ ಅಲ್ಲ ಎಂದು ದೊಡ್ಡ ಗೌಡರು ಕಣ್ಣೀರಿಟ್ಟು ಸಾಕಷ್ಟು ನೀರನ್ನು ತುಂಬಿಸಿದ್ದರು. ಇದಕ್ಕೆ ತಮ್ಮ ಕಣ್ಣಿನ ನೀರನ್ನೂ ಸೇರಿಸಿರುವ ಕುಮಾರ, ಓಟು ಕೊಡಿ, ಹಿಂದೆ ಯಾಕೆ ಕೊಡಲಿಲ್ಲ ಎಂದೆಲ್ಲಾ ಕೇಳಿ ಧಾರೆ ಹರಿಸಿದ್ದಾರೆ. ಈಗ ಕುಮಾರಧಾರೆ ದಿಢೀರ್ ಹರಿದಿರುವ ಹಿನ್ನೆಲೆಯಲ್ಲಿ ಆ ಊರಿನಲ್ಲಿ ಬೋಟಿನಲ್ಲಿ ಹೋಗಿ ಸುತ್ತಾಡಬೇಕಾಯಿತು ಎಂದು ಅಸತ್ಯದ ಅನ್ವೇಷಣೆಯಲ್ಲಿರುವ ನಮ್ಮ ವರದ್ದಿಗಾರರು ಹೇಳಿದ್ದಾರೆ. ಈ ಬಾರಿ ಪುನಃ ನಿದ್ರೆಗೆ ಜಾರಿಸದಂತೆ ಅವರ ಮೇಲೆ ಒತ್ತಡ ಹೇರಲಾಗುತ್ತದೆ ಎಂದು ತಿಳಿದುಬಂದಿದೆ.

Thursday, March 06, 2014

Night life ತಪ್ಪು ಸರಿಪಡಿಸೋಣ: ಅದು ಮಧ್ಯ ಅಲ್ಲ ಮದ್ಯ ರಾತ್ರಿ!

[ಬೊಗಳೂರು ಮದ್ಯದ ರಾತ್ರಿ ಬ್ಯುರೋದಿಂದ]
ಬೊಗಳೂರು, ಮಾ.7- ಮದ್ಯ ತುಂಬಿದ ಮಧ್ಯ ರಾತ್ರಿಯನ್ನು ವಿಸ್ತರಿಸಲಾಗಿದೆ ಎಂಬ ವರದ್ದಿ ಕೇಳಿದರೆ ಕೇಳಬೇಕೇ? ಇಂತಹಾ ಬಾರ್ಕಿಂಗ್ ಸುದ್ದಿಗಳನ್ನು ಕೇಳಿ ನಿದ್ದೆಯಲ್ಲೇ ನಡಿಗೆ ಆರಂಭಿಸುವವರಿರುವ ಬೊಗಳೂರಿನಲ್ಲೇ ಕಾರ್ಯಾಚರಿಸುತ್ತಿರುವ ಬೊಗಳೆ ಬ್ಯುರೋ ಕೂಡ ದಿಢೀರನೇ ಎಚ್ಚೆತ್ತುಕೊಂಡಿದ್ದು, ಹೊಸ ಸಂಗತಿಯನ್ನು ತರಲು ಸಿದ್ಧತೆ ಭರದಿಂದಲೇ ಸಾಗಿದೆ.

ಸರಕಾರ ಈಗಾಗಲೇ ಬೊಗಳೂರಿನಲ್ಲಿ ರಾತ್ರಿ ಒಂದು ಗಂಟೆಯವರೆಗೆ ಕುಡಿದು ಕುಪ್ಪಳಿಸಲು ಅನುಮತಿ ನೀಡಿದೆ. ಇದರ ಹಿಂದಿನ ಮರ್ಮವೇನೆಂದು ತಿಳಿಯಲು ಅಸತ್ಯದ ಅನ್ವೇಷಣೆಗಾಗಿ ಹೊರಟಾಗ ಈ ವರದ್ದಿ ದೊರೆತಿದೆ.

ಈಗ ಕಾಲ ಬದಲಾಗಿದೆ. ರಾತ್ರಿ ಹಗಲು ಆಗಿದೆ, ಹಗಲು ರಾತ್ರಿ ಆಗಿದೆ. ಕೆಲವರಿಗಂತೂ ಹಗಲಲ್ಲೇ ನಕ್ಷತ್ರಗಳೂ ಗೋಚರಿಸುತ್ತವೆ. ಈ ಹಿನ್ನೆಲೆಯಲ್ಲಿ ನಿದ್ದರಾಮಯ್ಯ ಸರಕಾರವೇ ಈ ಕ್ರಮಕ್ಕೆ ಮುಂದಾಗಿದೆ ಎಂಬುದು ಪ್ರಾಥಮಿಕ ತನಿಖೆಯ ವೇಳೆ ತಿಳಿದುಬಂದಿರುವ ಅಂಶ.

ಇದರ ಹಿಂದೆ ಪರಮಜ್ಞಾನಿಗಳ ತಂಡವೊಂದೂ ಕೆಲಸ ಮಾಡಿದೆ. ಮದ್ಯದ ವ್ಯವಹಾರಗಳೆಲ್ಲವೂ ರಾತ್ರಿಯಲ್ಲೇ ನಡೆಯುತ್ತಿರುವುದು. ಅದು ಸಾಗಿಸುವುದಿರಲಿ, ಕುಡಿಯುವುದಿರಲಿ, ಕುಣಿಯುವುದಿರಲಿ... ಮತ್ತು ಮದ್ಯದ ಆರಾಧನೆ ಮಾಡುವುದೇ ಇರಲಿ... ಈ ಕಾರಣದಿಂದಾಗಿ ಪರಮಾಜ್ಞಾನಿಗಳು ನೀಡಿದ ಸಲಹೆಯನ್ನು ನಿದ್ದರಾಮಯ್ಯ ಸರಕಾರ ಸ್ವೀಕರಿಸಿದೆ ಎಂದು ದೃಢಪಡಿಸದ ಮೂಲಗಳು ಖಚಿತಪಡಿಸಿವೆ.

ನೈಟ್ ಲೈಫ್ ಅಂತ ಕರೆಯುವುದೇಕೆ? ಈಗ ಹೇಗಿದ್ದರೂ ಹಗಲು ರಾತ್ರಿಗೆ ವ್ಯತ್ಯಾಸವಿಲ್ಲದಿರುವುದರಿಂದ, ನೈಟ್ ಎಂಬುದನ್ನು ಒಡೆದು ಹಾಕಿದರಾಯಿತು. ಆಗ ಎಲ್ಲೆಲ್ಲೂ ಲೈವ್ಲಿ ಲೈಫ್ ತುಂಬಿರುತ್ತದೆ ಎಂಬುದು ಒಂದು ಸಲಹೆಯಾದರೆ, ಮತ್ತೊಂದು ಅತ್ಯುತ್ತಮ ಶಿಫಾರಸು ಎಂದರೆ, ಮಧ್ಯ ರಾತ್ರಿ ಎಂದು ಯಾರೋ ಮಹಾಪ್ರಾಣಿಗಳು ಅಕ್ಷರವೊಂದನ್ನು ಒತ್ತಿ ಹೇಳಿದ್ದಾರೆ. ಅದು ನಿಜಕ್ಕೂ ಮದ್ಯ ರಾತ್ರಿ ಆಗಿತ್ತು. ಅಮಲೇರಿದಾಗ ಜನರ ನಾಲಿಗೆಯಲ್ಲಿ ಹೇಗೂ ಅಲ್ಪ ಪ್ರಾಣಿ ಮತ್ತು ಮಹಾಪ್ರಾಣಿಗಳಿಗೆ ವ್ಯತ್ಯಾಸ ಗೊತ್ತಾಗುವುದಿಲ್ಲವಾದುದರಿಂದ ಈ ರೀತಿ ತಪ್ಪಾಗಿ ಹಿಂದಿನ ಕಡತಗಳಲ್ಲಿ ಛಾಪಿಸಿದ್ದಾರೆ. ಇದನ್ನು ನಾವಾದರೂ ಸರಿಪಡಿಸಬೇಕು. ಅದು ಮದ್ಯ ರಾತ್ರಿಯೇ ಆಗಿರಲಿ, ಜನಕ್ಕೂ ಅದರ ನಿಜವಾದ ಅರ್ಥ ಗೊತ್ತಾಗಲಿ ಎಂಬುದು ಇವರ ವಾದ.

ಈ ವಾದವನ್ನು ಕೇಳಿದ್ದೇ ತಡ, ಏನಾಯಿತು ಹೇಗಾಯಿತು ಎಂಬುದನ್ನು ಹಿಂದೆ-ಮುಂದೆ ನೋಡದೆ ಸಂಕಟ ಸದಸ್ಯರೆಲ್ಲರೂ ಒಕ್ಕೊರಲಿನಿಂದ ಅಂಗೀಕಾರ ಮುದ್ರೆ ಹಾಕಿಬಿಟ್ಟರು. ಹೇಗೂ ಚುನಾವಣೆಗಳು ಬರುತ್ತಿವೆ, ಮದ್ಯದ ಆರಾಧನೆ ಹೆಚ್ಚಾಗಿಯೇ ನಡೆಯುತ್ತಿರುವುದರಿಂದ, ರಾಜ್ಯದ ಬೊಕ್ಕಸವೂ ತುಂಬುತ್ತದೆ, ಅಪ್ಪಿ ತಪ್ಪಿದರೆ, ಮದ್ಯ ರಾತ್ರಿಯಲ್ಲಿ ವಾಹನ ಚಲಾಯಿಸಿದರೆ ದೇಶದ ಜನಸಂಖ್ಯೆ ಕಡಿಮೆಯಾಗುವ ಸಾಧ್ಯತೆಗಳನ್ನೂ ತಳ್ಳಿ ಹಾಕುವಂತಿಲ್ಲ. ಇದು ಜನಸಂಖ್ಯೆಯಲ್ಲಾದರೂ ಚೀನಾವನ್ನು ಹಿಂದಿಕ್ಕಲು ಸಜ್ಜಾಗಿರುವ ದೇಶದ ಮದ್ಯ ರಾತ್ರಿಯ ಶ್ರಮಕ್ಕೊಂದು ಕೊಡುಗೆಯೂ ಆಗಬಹುದು ಎನ್ನಲಾಗುತ್ತಿದೆ. ಹೆಚ್ಚಿನ ವಿವರಗಳನ್ನು ನಿರೀಕ್ಷಿಸಲಾಗುತ್ತಿದೆ.

ತಿಮಿಂಗಿಲಗಳಿಗೆ ಸಹಕಾರ: ಪ್ರಶ್ನೆ ಪತ್ರಿಕೆ, ಬೆಲೆ ಇಳಿಕೆಗಳಿಗೂ ನಿಷೇಧ

[ಬೊಗಳೂರು ಭಾಗ್ಯಗಳ ಬ್ಯುರೋದಿಂದ] ಬೊಗಳೂರು: ಜನರು ಸೀಲಿಂಗ್ ಫ್ಯಾನಿಗೆ ನೇಣು ಹಾಕಿಕೊಂಡು ಆತ್ಮಹತ್ಯೆ ಮಾಡಿಕೊಳ್ಳುತ್ತಿರುವುದರಿಂದ ಸೀಲಿಂಗ್ ಫ್ಯಾನನ್ನೇ ನಿಷೇಧಿಸಬೇಕು...